Тукай район суды иренә пычак белән тән җәрәхәте ясаган җирле хатын-кызга карата хөкем карары чыгарган. Өч бала анасы кеше гомеренә куркыныч тудырып, аңлы рәвештә сәламәтлеккә авыр зыян китерүдә гаепле дип табылган.
Низаг вакытында иренә пычак кадаган
Судта хатын-кыз гаебен тулысынча таныган һәм вакыйганың ничек булганын сөйләгән. Аның сүзләренә караганда, иртәнге аштан соң балалар әбиләренә киткән. Шуннан соң ир белән хатын арасында бәхәс чыккан, ул үзара этешүгә әверелгән.
Талашу вакытында хатын-кыз кухня пычагын алган. Ул моны ирен куркыту өчен генә эшләвен аңлаткан, чөнки ирнең моңа кадәр дә аңа кул күтәргәне булган. Этешкәндә, хатынның әйтүенчә, ул очраклы рәвештә иренең биленә пычак белән кадаган.
Ярадан кан акканын күргәч, хатын-кыз ашыгыч ярдәм чакырткан. Табиблар килгәнче яраны сөлге белән кысып торган. Ул иреннән гафу үтенгән һәм аңа зыян китерергә теләмәвен, бары тик үзен якларга тырышуын белдергән.
Зыян күрүче дә судта хатыны файдасына сөйләгән. Ир-ат пычакның кулда булуын күрмәвен, хатынының үзенә арттан кадавын әйткән. Аның сүзләренә караганда, хатыны куркып калган, ашыгыч ярдәм чакырткан һәм беренче ярдәм күрсәткән. Ир хатынын кичерүен һәм аны җинаять җаваплылыгына тартуны теләмәвен белдергән.
Эш буенча ашыгыч ярдәм фельдшеры да шаһитлек биргән. Ул чакыру буенча килгәндә ир-атның бил тирәсеннән яраланган булуын, хатынының яраны сөлге белән каплап торуын сөйләгән. Беренче ярдәм күрсәтелгәннән соң, зыян күрүчене хастаханәгә озатканнар.
Өч бала тәрбияләүче ана шартлы җәза алган
Хатын-кыз Россия Җинаять кодексының 111нче маддәсе 2нче өлешенең «з» пункты буенча — корал буларак кулланылган предмет белән кеше гомеренә куркыныч тудырган авыр тән җәрәхәте китерүдә гаепле дип табылган.
Җәза билгеләгәндә суд берничә йомшартучы шартны исәпкә алган. Хатын-кыз гаебен үзе килеп таныган, зыян күрүчегә беренче ярдәм күрсәткән, тикшерүгә булышкан. Моңа кадәр ул җинаять җаваплылыгына тартылмаган һәм уңай яктан характерлана. Моннан тыш, аның тәрбиясендә балигъ булмаган өч баласы бар.
Бу шартларны исәпкә алып, суд Россия Җинаять кодексының 73нче маддәсен кулланган. Нәтиҗәдә, хатын-кызга өч елга шартлы рәвештә иректән мәхрүм итү җәзасы билгеләнгән. Шартлы сынау вакыты да өч ел тәшкил итә.
Бу чорда аңа җинаять-башкарма инспекциясенә хәбәр итмичә даими яшәү һәм эш урынын үзгәртү тыела. Шулай ук рәсми хезмәт килешүе буенча эш бурычларын үтәү белән бәйле очраклардан тыш, кичке сәгать 10нан иртәнге 6га кадәр өйдә булырга тиеш.
Нет комментариев