Тупыл мамык очыра: сәламәтлеккә йогынтысы

Тупыл мамыгы үзе көчле аллерген булып саналмый, әмма ул кеше сәламәтлегенә тискәре йогынты ясап, төрле уңайсызлыклар тудырырга мөмкин.

Аның асылы шунда: мамык һавадагы тузанны, башка үсемлекләрнең серкәсен, гөмбә спораларын һәм төрле пычрак кисәкчекләрне үзенә җыеп, аларны «йөртүче» ролен үти. Шуның нәтиҗәсендә ул организм өчен өстәмә ярсытучыга әверелә.

Тупыл мамыгы тудыра торган тискәре күренешләр арасында иң еш очрый торганы - ул аллергик реакцияләр. Бу очракта шуны белеп торырга кирәк: мамык үзе түгел, ә аңа ябышкан тузан һәм серкә борын тыгылу, ютәл, күз кычыту һәм яшь агуга сәбәп була. Кечкенә җепселләр күзгә, борынга һәм тамакка кереп, кычыту, корылык китереп чыгара. Бу бигрәк тә балаларга һәм линза кигән кешеләргә нык сизелә. Астма яки сулыш юллары авырулары булган кешеләрнең хәле начараерга мөмкин.

Моннан тыш, өйләрдә дә ул уңайсызлык тудыра: тәрәзәдән керә, җиһазларга утыра, вентиляцияне томалый.

Үзеңне саклау өчен, мамык күп булган вакытта маска яки респираторсыз урамга чыкмаска, күзлек кияргә киңәш ителә. Шулай ук тупыллар күп булган урыннардан ераграк булу, урамнан кайткач битне юу һәм борынны чайкау, җилле һәм коры көннәрдә тәрәзәләрне ябу да ярдәм итә.