Татарстанда бала табу сертификатлары буенча финанслау 74 млн сумга артты
2026 ел башыннан Россия Социаль фондының Татарстан Республикасы буенча бүлеге бала табу сертификатлары программасы кысаларында медицина оешмаларына 74,7 млн сум күбрәк финанс чаралары күчергән. Бу чорда 6 меңнән артык хатын-кызга йөклелек, бала табу һәм бала тудырганнан соңгы күзәтү этапларында ярдәм күрсәтелгән.
Электрон бала табу сертификаты хатын-кыз консультациясенә, бала тудыру йортына яки балалар поликлиникасына беренче мөрәҗәгать вакытында рәсмиләштерелә. Моның өчен паспорт, ОМС полисы һәм СНИЛС кирәк. Медицина оешмасы хисапка куйганнан соң бер эш көне эчендә сертификат формалаша, ә мәгълүмат «Дәүләт хезмәтләре» порталындагы шәхси кабинетта күренә.
2026 елда сертификатның гомуми бәясе 12 мең сум булып кала. Ул билгеләнгән тәртиптә бүленә: йөклелек вакытында амбулатор күзәтүгә — 3 мең сум, хокукый, психологик һәм медик-социаль ярдәмгә — 1 мең сум, бала табу һәм аннан соңгы медицина ярдәме өчен — 6 мең сум, ә бала тормышының беренче елындагы профилактик тикшерүләргә — 2 мең сум.
Фонд вәкилләре аңлатуынча, ОМС кысаларында күзәтү үткән очракта акча турыдан-туры медицина оешмаларына күчерелә һәм максатчан кулланыла. Ә түләүле хезмәтләр өчен бала табу сертификаты гамәлгә ашырылмый.
Россия Социаль фондының Татарстан бүлеге идарәчесе Эдуард Вафин билгеләп үткәнчә, бу система табибларга әниләр һәм сабыйлар сәламәтлеген күзәтүгә игътибарны арттырырга мөмкинлек бирә, ә финанслауның ачык механизмы хезмәт сыйфатын күтәрүгә ярдәм итә.
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Нет комментариев