Казанда «Җиңү поезды» янында контракт буенча хәрби хезмәткә сайлап алу пункты ачылды

Бүген Казанга килгән «Җиңү поезды» янында контракт буенча хәрби хезмәткә сайлап алу пункты эшли башлады. Махсус палаткада теләге булган һәркем хезмәт шартлары турында мәгълүмат ала, гариза калдыра һәм беренчел сайлап алу узарга мөмкин.

Контракт буенча хәрби хезмәткә сайлап алу пункты офицеры Егор Горячев «Татар-информ»га сөйләгәнчә, биредә пилотсыз системалар гаскәрләренә аеруча игътибар бирелә. Кунакларга коптер тибындагы ике төрле пилотсыз очкыч — разведка өчен һәм һөҗүм функциясе дә булган катнаш вариант күрсәтелә.

Моннан тыш, мәйданчыкта Калашников автоматын сүтеп-җыю, саклану җиһазлары белән танышу мөмкинлеге дә бар. Экспозициядә шулай ук трофейлар — АКШ минасы һәм каска да тәкъдим ителгән.

Горячев сүзләренчә, бүген төп максат — пилотсыз системалар гаскәрләренә белгечләр җәлеп итү. Яшьләргә «киләчәк гаскәрләре» сафларына кушылу тәкъдим ителә.

Хәзер Татарстанда контракт төзегәндә бер тапкыр бирелә торган түләү 2,9 млн сумга җитә. Бу — Идел буе федераль округындагы иң югары күрсәткечләрнең берсе.

Чыганак: Татар-Информ мәгълүмат агентлыгы