Дәүләт Думасы студент гаиләләрнең торак шартларын яхшыртуны хуплады

Дәүләт Думасы депутаты, кече һәм урта бизнес комитеты председателенең беренче урынбасары һәм «Бердәм Россия» партиясенең «Эшмәкәрлек» федераль проекты координаторы Әлфия Когогина билгеләп үтүенчә: «Яшь гаиләләр, бигрәк тә балалары булган гаиләләр өчен студент вакытта торак мәсьәләсе бик әһәмиятле. Яңа закон балалары булган студентларга яки никахта торучыларга тулай торакта аерым бүлмә алу мөмкинлеге бирә. Студент әлеге бүлмәдә гаиләсе белән тора ала».

Бүгенге көндә вузларда укучы 28 меңнән артык студентның гаиләсе бар. Социологик сораштырулар күрсәткәнчә, студентларның якынча 60 % гаилә корырга тели, әмма рәсми рәвештә никахта бары тик 3,3 % кеше генә тора.

Кабул ителгән документ буенча университетлар һәм институтлар студент гаиләләр өчен каралган торак урыннар турында мәгълүмат бирергә тиеш була, бу тулай торакта бүлмәләрне бүлүне яхшырак планлаштырырга мөмкинлек бирә.