Катастрофалар медицинасы үзәге 2025 ел нәтиҗәләрен чыгарды һәм 2026 елга бурычлар билгеләде

Республика катастрофалар медицинасы үзәге 2025 ел нәтиҗәләрен ясап, 2026 елга өстенлекле юнәлешләрне билгеләде. Бу хакта Республика клиник хастаханәсе каршындагы Хастаханә советы утырышында хәбәр ителде.

Узган ел табиблар пациентлар янына автомобиль һәм вертолет ярдәмендә 815 тапкыр чыккан, 595 кеше эвакуацияләнгән. Үзәк штатында 4 автомобиль бригадасы һәм 1 авиамедицина бригадасы эшли. Кирәк булганда эшкә 253 ашыгыч ярдәм бригадасы һәм 124 табиб-шәфкать туташы бригадасы җәлеп ителә.

Гадәттән тыш хәлләр буенча күрсәткечләр дә кимегән. Татарстанда 2025 елда мондый очракларда зыян күрүчеләр саны узган ел белән чагыштырганда 26 процентка азайган, ә гадәттән тыш хәлләр саны 79 очрак тәшкил иткән (элек — 110). Бу турыда Республика катастрофалар медицинасы үзәге җитәкчесе Марина Воронцова белдерде.

Консультатив ярдәм юнәлешендә дә актив эш алып барылган: ел дәвамында 9 366 консультация һәм 717 телемедицина консультациясе үткәрелгән.

Юл-транспорт һәлакәтләре статистикасы буенча, 2025 елда Татарстанда 3 339 авария теркәлгән, аларда 4 430 кеше зыян күргән, 345 кеше һәлак булган. Федераль трассаларда күрсәткечләр кимегән. Шул ук вакытта балалар катнашындагы юл-транспорт һәлакәтләре саны 7,1 процентка артып, 465 очракка җиткән.

2026 елга Республика катастрофалар медицинасы үзәге дүрт төп бурыч билгели. Алар арасында — Татарстан Сәламәтлек саклау министрлыгы билгеләгән стратегик үсеш планын гамәлгә ашыру, катастрофалар медицинасы проектларын әзерләү, ашыгыч ярдәм һәм санитар авиация белән идарә итүнең мәгълүмат системаларын камилләштерү, шулай ук табибларны, урта медицина персоналын һәм халыкны беренче ярдәм күрсәтү күнекмәләренә өйрәтү программаларын киңәйтү.

Фото һәм мәгълүмат Сәламәтлек саклау министрлыгы сайтыннан алынды