Балалар куркынычсызлыгы — игътибар үзәгендә

Бәтке авылының «Алёнушка» балалар бакчасында гадәти булмаган дәрес узды. Китапханәчеләр әзерлек төркеме балалары белән очрашып, бик җитди темага — террор куркынычы янаганда үзеңне ничек тотарга кирәклеге турында сөйләштеләр.

Нәниләр түбәндәге кагыйдәләрне үзләштерделәр:

• ни өчен хуҗасыз уенчыкларга һәм сумкаларга тияргә ярамый;

• бина җимерелеп, шуның астында калган очракта, көчне ничек сакларга һәм дөрес сулыш алырга;

• күктә пилотсыз очу аппараты (дрон) күренгәндә нишләргә.

Балалар белгечләрне игътибар белән тыңлап кына калмадылар, ә үзләрен кызыксындырган сорауларны да бирделәр, мисаллар да китерделәр. Хәзер алар төп кагыйдәне белә: паникага бирелмәскә, чөнки ярдәм һичшиксез киләчәк!