«Россия – Ислам дөньясы» стратегик караш төркеме традицион ислам кыйммәтләренә таянып, социаль хезмәтнең яңа моделен тәкъдим итте. «Мәрхәмәт кулы» проекты һөнәри осталыкны әхлакый нигез белән берләштерүне максат итә.
Проект «Ярдам» фонды, Россия ислам институты һәм Татарстан мөселманнары Диния нәзарәте белән берлектә гамәлгә ашырыла. Аның төп бурычы – өлкәннәр, инвалидлар һәм мохтаҗларга медицина хезмәтен рухи-әхлакый караш белән күрсәтә белгән белгечләр әзерләү.
Стратегик караш төркеме рәисе урынбасары, Татарстан Рәисе ярдәмчесе Марат Гатин сүзләренә караганда, инициатива рухи кыйммәтләрне актуаль социаль практикаларга кертүдә үрнәк булып тора. Ул шулай ук проектның илкүләм проблемаларны чишүгә өлеш кертә һәм халыкара хезмәттәшлеккә ачык булуын билгеләп үтә.
Махсус хәрби операциядә катнашучыларга ярдәмгә аерым игътибар бирелә: алар өчен эчке халәтне яңадан җайга салу һәм гармонияләштерүгә юнәлдерелгән комплекслы рухи-психологик ярдәм каралган.
Ике ел эчендә «Исламда социаль хезмәт» 60 сәгатьлек курс буенча 180дән артык белгеч белем алган. Проект Казан һәм Әлмәттән Ижау һәм Ульяновскига кадәр таралган, ә онлайн-платформа ярдәмендә башка төбәкләргә дә тәҗрибә җиткерелә. Моннан тыш, балаларга кечкенәдән өлкәннәргә хөрмәт тәрбияләү өчен махсус модуль әзерләнә.
«Мәрхәмәт кулы» инициативасы хәйрия акчалары белән финанслана, шуңа күрә ул аз керемле гаиләләргә ярдәм күрсәтергә мөмкинлек бирә. Проект инде Джакартада узган Халыкара тынычлык форумында танылу алган.
Нет комментариев