2026 ел башыннан Татарстанда хайваннар арасында котыру авыруы ачыкланган 29 пункт ачыкланган. Авыру очраклары республиканың 18 районында һәм Казанда теркәлгән. Тукай районын да кертеп, алты муниципаль берәмлектә карантин кертү мәсьәләсе карала. Бу хакта «Татар-информ» агентлыгы Татарстан Министрлар Кабинетының Баш ветеринария идарәсе башлыгы урынбасары Габделхак Мотыйгуллинга сылтама белән хәбәр итә.
Ветеринария хезмәте мәгълүматларына караганда, быел котыру авыруы күбрәк мәчеләрдә ачыклана. Тукай районының Әҗмәкәй авыл җирлегендә 2 октябрьдә котыру чире йоктырган мәче кешеләргә ташланган. Моннан тыш, авыру очраклары Сарман, Мамадыш, Минзәлә, Бөгелмә һәм Актаныш районнарында да теркәлгән.
Белгечләр котыруның кешеләр өчен дә аеруча куркыныч булуын искәртә. Хайван тешләгәндә, тырнаганда яки аның селәгәе зарарланган тирегә эләккәндә, яраны кичекмәстән сабынлы су белән юарга һәм шул ук көнне медицина учреждениесенә мөрәҗәгать итәргә кирәк. Селәгәй лайлалы тышчаларга яки тырналган урыннарга эләккән очракта да табибка баруны кичектерергә ярамый.
Ветеринарлар йорт хайваннарына вакытында котыруга каршы прививка ясатырга һәм кыргый җәнлекләр белән якын элемтәгә кермәскә киңәш итә. Торак пунктта төлке яки башка кыргый хайван күренсә, бигрәк тә ул үзен гадәттәгечә тотмаса, бу хакта тиешле хезмәтләргә хәбәр итәргә кирәк.
Нет комментариев