Тукай районының Яшьләр үзәгендә «Мотодрайв: ЮХИДИ инспекторы белән түгәрәк өстәл» дип аталган профилактик чара үткәрелде. Очрашуда Кнәз мәктәбе укучылары — җиденче һәм тугызынчы сыйныфлардан килгән яшүсмерләр катнашты. Укучылар район җитәкчелеге, ЮХИДИ хезмәткәре һәм юл хәрәкәте иминлеге белгечләре белән аралашып, үзләрен кызыксындырган сорауларга җаваплар алды.
Яшьләр өчен грант
Очрашу «Мотодрайв» проекты кысаларында оештырылды. Быел Тукай районының Яшьләр үзәге Татарстан Республикасы Яшьләр эшләре министрлыгының муниципаль берәмлекләрдә яшьләр сәясәтен гамәлгә ашыручы учреждениеләр арасында үткәрелгән грант конкурсында җиңү яулады.
Грант акчалары районда яшьләр инициативаларын үстерүгә генә түгел, ә үз мототехникасын сатып алуга да мөмкинлек бирде. Яшүсмерләрнең куркынычсызлыгын тәэмин итү максатыннан, техниканы махсус килешү нигезендә «Наиком Арена» комплексына арендага тапшыру планлаштырыла. Анда яшьләр инструкторлар күзәтүе астында мотоспорт белән профессиональ дәрәҗәдә һәм имин шартларда шөгыльләнә алачак.
Район җитәкчелеге белән ачыктан-ачык сөйләшү
Очрашу башында Яшьләр үзәге директоры Алина Шакурова район җитәкчелегенә яшь буынга күрсәткән игътибары өчен рәхмәт белдерде.
Укучылар алдында беренче булып Тукай районы башкарма комитеты җитәкчесе, районның юл хәрәкәте иминлеге комиссиясе рәисе Линар Маняпов чыгыш ясады. Ул яшүсмерләр белән юлда үз-үзеңне тоту кагыйдәләре турында сөйләште һәм мототехниканың гомуми кулланылыштагы юлларда йөрү өчен түгеллеген искәртте.
— Зур үтенечем бар: укытучыларыгыз дәресләрдә юл хәрәкәте кагыйдәләрен үтәргә, караңгы вакытта яктылык кайтаргыч элементлары булган кием кияргә кирәклеге турында әйткәндә, моны игътибарсыз калдырмагыз. Кагыйдәләрне үтәргә кирәк. Чөнки нәтиҗәләре бик авыр булырга мөмкин, — дип мөрәҗәгать итте Линар Маняпов укучыларга.
Җаваплылык һәм юл-транспорт һәлакәтләрен кисәтү
Юл хәрәкәте кагыйдәләрен искә төшерүгә шулай ук Чаллы шәһәрендәге «Юл хәрәкәте иминлеге» дәүләт бюджет учреждениесенең территориаль идарәсе вәкилләре — профилактика бүлеге җитәкчесе Ләйсән Закирова һәм баш белгеч Эльвира Фазлыева кушылды. Алар укучыларга юл-транспорт һәлакәтләрен кисәтүгә багышланган видеороликлар күрсәтте.
Фикер алышуда Татарстан Республикасы буенча Эчке эшләр министрлыгының ЮХИДИ идарәсенә караган махсус батальонның икенче ротасы юл-патруль хезмәте өлкән инспекторы, полиция лейтенанты Марат Ахунов та катнашты. Ул яшүсмерләр белән мототехникада куркынычсыз йөрү турында сөйләште.
— Бәлки, киләчәктә сезнең арадан танылган спортчылар да чыгар. Шуңа күрә шөгыльләнегез, әмма шуны онытмагыз: юл — уен урыны түгел, ул куркыныч чыганагы булган урын, — дип ассызыклады ЮХИДИ вәкиле.
Түгәрәк өстәл ахырында укучылар полиция лейтенантына һәм башкарма комитет җитәкчесенә үзләрен кызыксындырган сорауларны турыдан-туры бирә алды.
Нет комментариев