Тукай районы ветеринария хезмәте бинасын яңартуга 4,1 млн сум бүлеп бирелә
җәмгыять

Тукай районы ветеринария хезмәте бинасын яңартуга 4,1 млн сум бүлеп бирелә

Чаллының ЗЯБ бистәсендә урнашкан Тукай районы дәүләт ветеринария берләшмәсе бинасын капиталь ремонтлау планлаштырыла. Әлеге эшләрне башкару өчен электрон аукцион игълан ителгән. Сатып алулар өлкәсендәге бердәм мәгълүмат системасында урнаштырылган мәгълүматларга караганда, хәзерге вакытта гаризалар кабул итү бара.

Эшләрнең заказчысы – «Татарстан Республикасының Башстрой» дәүләт бюджет учреждениесе. Тимерьюлчылар тыкрыгындагы 7нче йортны яңартуга 4,1 миллион сумнан артык акча каралган. Ремонт кысаларында бинаны тулысынча төзекләндерү, аның тирә-ягын тәртипкә китерү күздә тотыла. Шулай ук ветеринария хезмәте өчен яңа җиһазлар, мебель һәм кирәк-яраклар сатып алыначак.

Тукай районы ветеринария хезмәте нинди эшләр башкара?

Учреждениенең рәсми сайтында хәбәр ителгәнчә, Тукай районы дәүләт ветеринария берләшмәсе халыкка һәм авыл хуҗалыгы предприятиеләренә төрле хезмәтләр күрсәтә. Алар арасында терлекләргә вакцина ясау, паразитларга каршы эшкәртү, дезинфекция үткәрү, хирургик ярдәм күрсәтү, шулай ук азык-төлек чималына һәм хайваннардан алынган продукциягә ветеринария-санитария экспертизасы үткәрү бар.

Тукай районы дәүләт ветеринария берләшмәсе халыкка һәм авыл хуҗалыгы предприятиеләренә төрле хезмәтләр күрсәтә

 

Ике катлы бина Чаллының ЗЯБ бистәсендә урнашкан. Әлеге бистәнең төп өлеше узган гасырның 1950–1960нчы елларында төзелгән.

Республикадагы башка объектлар да ремонтланачак

Тукай районы ветеринария хезмәте бинасын яңарту республика күләмендәге зур проект кысаларында башкарылачак. Гомуми бәясе 110,49 миллион сум булган әлеге сатып алуга Татарстанның агросәнәгать һәм урман хуҗалыкларына караган ике дистәгә якын объектны капиталь ремонтлау да кертелгән.

Алар арасында Алабуга районындагы (Максим Горький һәм Азин урамнарындагы ике бина), Менделеевск, Әгерҗе, Әлмәт, Буа һәм Чистай районнарындагы ветеринария берләшмәләре биналары бар. Моннан тыш, Түбән Кама, Актаныш һәм Алексеевск районнарындагы Татарстан Авыл хуҗалыгы һәм азык-төлек министрлыгы идарәләре, Казан һәм Арча районындагы «Россельхозцентр» филиаллары, шулай ук берничә райондагы урман хуҗалыклары биналары да капиталь ремонтланачак.


Нет комментариев