«Әниемнең тәмле сере»: «Якты юл» газетасы бәйгегә катнашырга чакыра!
җәмгыять

«Әниемнең тәмле сере»: «Якты юл» газетасы бәйгегә катнашырга чакыра!

Районыбызның һәр гаиләсендә буыннан-буынга кадерләп сакланып, әниләрдән кызларга, әбиләрдән оныкларга тапшырылып килгән үзенчәлекле рецептлар бар. Өйгә таралган яңа пешкән бәлеш исе, бәйрәм табынының күрке булган кетердәп торган чәк-чәк, телеңне йотарлык йомшак кабартмалар... Һәр ризыкның үз тарихы, һәр хуҗабикәнең үз сере бар. Ә иң тәмле ризыкларга, һичшиксез, әниләребезнең күңел җылысы кушылган.

«Әниемнең тәмле сере» бәйгесе

 

29 ноябрьдә иң кадерле бәйрәмнәрнең берсе – Әниләр көнен билгеләп үтәчәкбез. Шул уңайдан «Якты юл» газетасы редакциясе үзенең tukai-rt.ru сайтында «Әниемнең тәмле сере» дип исемләнгән бәйге игълан итә!

Әниегезнең яки әбиегезнең аш-су осталыгы белән бөтен Тукай районын таныштырыгыз! Аның яратып пешерә торган ризыгын, гаиләгездә буыннан-буынга сакланып килгән кадерле рецептын башкалар белән дә уртаклашыгыз.

Бәйгедә катнашу өчен өч гади адымны үтәү җитә:

  1. Әниегезне яки әбиегезне үзе әзерләгән ризык белән бергә фотога төшерегез.

  2. Ризыкның рецептын языгыз: кирәкле ингредиентларны, әзерләү тәртибен күрсәтегез. Шулай ук әниегез яки әбиегез турында 3–4 җылы җөмлә өстәгез.

  3. Әзер язмагызны 25 ноябрьгә кадәр безгә юллагыз.

Рецептларны түбәндәге ысулларның берсе белән җибәрергә мөмкин:

  • редакциянең эш номеры буенча MAX, WhatsApp яки Telegram мессенджерларына: +7 (927) 045-03-47;
  • ВКонтактедагы «Тукай районы яңалыклары» төркеменә.

Бәйге ничек узачак?

  • 25 ноябрьгә кадәр – рецептлар кабул ителә;
  • 26–28 ноябрьдә – tukai-rt.ru сайтында халык тавыш бирүе узачак;
  • 29 ноябрьдә – бәйге җиңүчеләре игълан ителәчәк;
  • 30 ноябрьдә – бүләкләү тантанасы була.

Катнашучыларның барлык рецептлары да газетабыз сайтында урын алачак. Шулай итеп, районыбыз халкы бер-берсенең кулинария серләре белән таныша, ә гаиләдә кадерләп сакланган рецептлар тагын да күбрәк кешегә билгеле булачак. Иң күп тавыш җыйган һәм укучыларның күңеленә хуш килгән рецепт авторларын редакция һәм партнерларыбыз әзерләгән бүләкләр көтә. Ә иң матур гаилә тарихлары газетабыз битләрендә дә басылып чыгачак. 

Рецептларыгызны көтеп калабыз! 

 


Нет комментариев