2027 елда Россиядә бердәм пособие, бала туганда бирелә торган түләү һәм бала карау пособиеләре күләме артырга мөмкин. Үзгәрешләр бюджет проектларында каралган. Бу хакта Дәүләт Думасы депутаты Алексей Говырин хәбәр итте.
Парламентарий сүзләренчә, 2027 елның 1 гыйнварыннан бердәм пособие 6,8 процентка артырга мөмкин. Балалар өчен федераль яшәү минимумы 19 620 сум булганда, айлык түләү 9 810, 14 715 яки 19 620 сум тәшкил итәчәк. Аның күләме гаиләнең кеременә һәм төбәктәге балалар өчен билгеләнгән яшәү минимумына бәйле булачак.
Татарстанда 2027 елда хезмәткә сәләтле халык өчен яшәү минимумы 18 740 сум булыр дип көтелә. Йөкле хатын-кызларга бирелә торган пособие әлеге күрсәткечне исәпкә алып билгеләнәчәк.
Социаль түләүләрне индексацияләүнең чираттагы этабы 1 февральгә планлаштырылган. Фаразланган 6,8 процентлы артуны исәпкә алганда, бала туганда бер тапкыр бирелә торган пособие 28 450,45 сумнан 30 385,08 сумга кадәр җитәргә мөмкин. Бала карау буенча минималь айлык түләү 10 669,64 сумнан 11 395,18 сумга кадәр артыр дип көтелә.
Моннан тыш, 140 көнлек декрет ялы өчен максималь пособие 1,1 миллион сумнан, ә эшләүче ата-аналар өчен балага яшь ярым тулганчы түләнә торган максималь айлык пособие 95,5 мең сумнан артырга мөмкин. Түләүләрнең төгәл күләме алучының хезмәт хакына да бәйле булачак.
Индексациянең соңгы күләме 2026 ел нәтиҗәләре буенча инфляция дәрәҗәсен исәпкә алып билгеләнәчәк. Әлеге суммалар әлегә алдан исәпләнгән күрсәткечләр булып тора.
Нет комментариев