Эльвира Абдуллина автор яңалыклары

• 17 декабрь 2019

  Яңа елдан нәрсә көтәбез?

  Әле кайчан гына 2019 елны каршы алган идек, инде 2020 елга аяк басарга да санаулы гына көннәр калып бара. Вакыт дигәнең сизелми дә үтә. Яңа елны һәркем матур өметләр, изге хыяллар белән көтә. Нәкъ менә Яңа елда ниндидер бер могҗиза булыр кебек. Аеруча балалар өчен Яңа ел иң матур, иң күңелле, иң көтеп алган бәйрәмнәрнең берсе. Шулай булмый мөмкин дә түгел. Ул бит матур уй-хыяллар, сихри мизгелләр, кызыклы, мавыктыргыч, иң мөһиме – көтелгән бүләкләр бәйрәме. Без үскән чорда тәм-том салынган капчык иң зур бүләк иде! Авылларда җигелгән тарантаслар белән, гармуннар уйнап, Кыш Бабай белән Кар кызы ул бүләкләрне үзләре таратып йөрер иде. Алма, мандарин, карамель конфетлары, пачкалы вафли-печеньелар булыр иде ул пакетларда. Ә мәктәптә Яңа ел кичәсенә әзерләнү үзе бер вакыйга иде. Спортзалда торган зур чыршыны бергәләп бизибез, аңа кәгазьдән, башка төр материаллардан уенчыклар ясыйбыз. Бүгенге кебек ниндие кирәк шундый уенчыклар тезелеп тормый иде ул чакта кибетләрдә. Рәсем конкурслары, стена газеталары бәйгеләре тагын... Хәзер заманалар бераз үзгәрде, балаларның ихтыяҗлары да күпмедер артты. Өлкәннәр нинди уй-фикерләр белән яши дә Яңа ел алдыннан, балаларыбыз Кыш бабайдан нинди могҗиза көтә? Газета укучыларыбыздан без шул хакта сораштык. 

  
• 14 декабрь 2019

  Техника төзекләндерелә

  Бүген районның авыл хуҗалыгы предприятиеләрендә тулы куәтенә техника ремонтлау бара. Авыл хуҗалыгы һәм азык-төлек идарәсенең механикалаштыру буенча консультанты Газинур Хөснуллин хәбәр иткәнчә, районда барлыгы 244 данә чәчкеч, 32 чәчү комплексы, 210 культиватор, 4089 тырма, 542 трактор исәпләнә. Чәчүдә катнашасы техниканы 1 мартка ремонтлап бетерү бурычы куелса да, район аграрийлары тырмалар төзекләндерүне декабрь аенда, культивация агрегатларын январь аенда тәмамларга планлаштыралар. 

  
• 11 декабрь 2019

  Шәфкать һәм мәрхәмәт мәктәбе

  Теләнче Тамак авылының тернәкләндерү интернат-мәктәбе үзенең 55 еллыгын билгеләп үтте. Бәйрәм кичәсендә район җитәкчелеге, мәртәбәле кунаклар, төрле елларда эшләп, бүгенге көндә лаеклы ялга чыккан ветеран-укытучылар, техник хезмәткәрләр, биредә укып, тормышта үз юлларын тапкан укучылар катнашты. Бу көнне мәктәпнең тарихын барладылар, анда озак еллар балаларга белем һәм тәрбия биргән ветераннарны хөрмәтләп искә алдылар. Бәйрәм укучыларның матур шигырьләре, моңлы җырлары белән үрелеп барды.

  
• 29 ноябрь 2019

  Социаль үсеш – грант исәбенә

  Район хакимиятендә «Социаль эшкуарлар, коммерциянеке булмаган оешмалар һәм территориаль үзидарә органнары» ассоциациясе түгәрәк өстәл уздырды. Биредә коммерцияле булмаган оешмаларга үз эшчәнлеген киңәйтү һәм иҗтимагый-файдалы проектларны тормышка ашыру максатыннан грантлар алу мөмкинлеге турында сөйләштеләр. Очрашуда үз идеяләре булган 100гә якын кеше катнашты. 

  
• 28 ноябрь 2019

  Семинарлар старт алды

  Авыл хуҗалыгы тармагының актуаль мәсьәләләре буенча традицион семинарлар башланды. Аның беренчесе «Тукай азык-төлек корпорациясе»ндә узды. Анда хуҗалык җитәкчеләре, белгечләр катнашты. Семинарлар ике атна саен бер хуҗалыкта узачак.

  
• 27 ноябрь 2019

  Референдум раслады

  Быел үзара салым программасы буенча референдумнар дүрт җирлектә – Мусабай-Завод, Бәтке, Кече Шилнә һәм Кнәздә уза. Калганнарында халык җыеннары оештырыла. Якшәмбе көнне беренче референдумнар үтте. Алар Мусабай-Завод һәм Бәтке җирлекләрендә узды. Биредә яшәүчеләр үз җирлекләренең социаль йөзен үзгәртү өчен тавыш бирде. Мусабай-Заводта теркәлгән халыкның – 89, Бәткедә 73 проценты катнашып, бу җирлекләрдә референдум уңышлы узды дип белдерелде. 

  
• 25 ноябрь 2019

  Мәчет яңа төс алды

  «Якты юл» газетасы редакциясенә Казаклар авылы мәчетенең имамы Зәки Ризатдиновтан сөенечле хәбәр килде: «Быел Аллаһ йортыбыз яңа төсмер алды – тәрәзәләр алмаштырылды, бинаның тышкы ягын буядык. Бу игелекле эшнең башында торган район башлыгы Фаил Камаевка, эшне башкарып чыккан ПО "Пластик"ка авыл халкы исеменнән рәхмәт сүзләре җиткерәсем килә. Саваплы гамәл кылдыгыз! Шундый изге эшләр кылучылар турында Пәйгәмбәребез үзенең бер хәдисендә: «Аллаһ Тәгалә ризалыгы өчен эшләнгән гамәлләр хәзер үк яки соңрак барыбер сиңа бәхет вә шатлык китерәчәк», – дигән». 

  
• 22 ноябрь 2019

  Бердәмлектә – көч 

  Республикада авылларда кече һәм урта бизнесны үстерүгә зур игътибар бирелә. Ел саен шәхси ярдәмче, крестьян-фермер хуҗалыкларына, гаилә фермаларына ярдәм итү йөзеннән 2 млрд сумнан артык акча юнәлтелә. Икенче ел яшь кооперативларга ярдәм итү буенча республика программасы эшли. Тукай районында да кулланучылар кооперативы кебек отышлы юнәлеш үсеш алды.

  
• 20 ноябрь 2019

  Сатучы да, алучы да канәгать

  Чаллы шәһәрендә көзге ярминкәләр дәвам итә. Алар һәр шимбә-якшәмбе эшли һәм ел азагына кадәр дәвам итәчәк. Ярминкәләр өч мәйданда уза. Бу – ГЭС бистәсенең «Төзүчеләр» стадионында (Габдулла Тукай Яр буе урамы), «Южный» агросәнәгать паркында һәм Чулман проспектының Ипподром территориясендә. Биредә Тукай районыннан кала, Сарман, Мөслим, Минзәлә, Әгерҗе, Актаныш, Менделеевск районнарында җитештерелгән яшелчә, сөт һәм ит продуктларын, җиләк-җимеш, бал, көнкүреш кирәк-яракларын сатып алырга мөмкин. 

  
• 15 ноябрь 2019

  Без язылдык!

  «Якты юл» («Светлый путь») газетасына 2020 елның беренче яртысына язылу дәвам итә. Ул Тукай районындагы бердәнбер рәсми матбугат чарасы. Язылу кампаниясе ел азагына кадәр барачак. Димәк, вакыт бар әле. Исегезгә төшерәбез, газетаның чәршәмбе һәм җомга саннарына ярты елга язылу бәясе 711 сум, җомга санына аерым гына язылганда – 636 сум. Редакциядән килеп алу шарты белән альтернатив рәвештә язылырга була. Ул арзанрак – 450 сум. Газета укучыларыбыз өчен сөенечле хәбәр дә бар. 2сеннән 12 декабрьгә кадәр матбугатка язылу декадасы уза. Аның кысаларында газетага 15 процент ташлама белән язылырга була. 

  
• 31 октябрь 2019

  Курыкмыйча эшлисе дә эшлисе...

  Районда үзмәшгульләр ассоциациясе оештырыла. Мондый оешма башкарма комитет ярдәме белән беренче тапкыр төзелә. 

  
• 30 октябрь 2019

  Суы бар, юлы да булырмы?

  Редакциянең Instagram челтәрендәге төркеменә Малтабар авылында яшәүче Нәсимә Гобәйдуллинадан хәбәр килде: «Ике ел элек Тынычлык урамына ком-таш түшәделәр, аңа сөенеп бетә алмадык. Әмма бүген бу юлны актарып, казып ташладылар – авылда су торбаларын алмаштыралар. Безгә сазлы юлдан йөрергә калды. Су кертергә кирәк анысы, әмма юлларны бозу кирәкме?» – дип сорый ханым.

  
• 26 октябрь 2019

  Иске Җиреклегә – яңа тротуар

  Редакциянең «кайнар линия»сенә Иске Җирекле авылында яшәүче Венера Маликова шалтыратты: «Шатлыклы вакыйга белән уртаклашасым килә, – дип сүзен башлады ханым. – Авылда күптән көтелгән тротуарны төзеп куйдылар. Моңа кадәр үзәккә машина юлыннан яки сазлы сукмактан йөрергә мәҗбүр идек. Хәзер исә рәхәтләнеп бетон тротуар буенча атлыйбыз. Лесная урамында яшәүчеләр исеменнән район башлыгы Фаил Камаевка, җирлек башлыгы Валентин Артемьевка рәхмәт сүзләрен җиткерәм», – диде ул.

  
• 25 октябрь 2019

  Авыл хезмәтчәннәре бәйрәме

  Авыл хуҗалыгы һәм эшкәртү сәнәгате хезмәткәрләре көне уңаеннан районкүләм бәйрәм тантанасы узды. Биредә авыл хуҗалыгы тармагының алдынгы хезмәткәрләре җыелды. Тантанада район башлыгы Фаил Камаев, ТР Авыл хуҗалыгы һәм азык-төлек министры урынбасары Ленар Гарипов катнашты.

  
• 23 октябрь 2019

  Цифрага – волонтерлар белән

  14 октябрьдән Россиянең 21 төбәгендә, шул исәптән Татарстанда да, аналоглы телеканалларны трансляцияләү туктатылды. Цифрлы сигналларны тотучы җыйланмалары булганнар аны сизми дә калды, ә кемнәргәдер заманча кабул итү приставкасы алырга һәм тоташтырырга туры килде. Андыйлар хәзер цифрлы 20 телеканалны карый.