Район Советының 39нчы утырышы үтте. Аның эшендә ТР премьер-министры урынбасары Васил Шәйхразиев, ТР Дәүләт Советы депутаты Николай Нефедов катнаштылар.  Көн тәртибенә бер сорау – Тукай муниципаль районының 2019 елда социаль-икътисадый үсеше һәм 2020 елга бурычлар кертелгән иде. Район башлыгы Фаил Камаев үз чыгышында иң актуаль мәсьәләләргә кагылды. 

Вера Петровна белән Александр Семенович алтмыш елдан артык тормыш диңгезендә бергә йөзәләр. Алар – бик сирәкләр өлешенә тигән олы бәхеткә ия парлар. Поповлар күптән түгел бриллиант туйларын үткәрделәр. 

«Мин, Нәзилә Гайнетдин кызы, 1930 елның 20 апрелендә Минзәлә районы Күзкәй авылында крестьян гаиләсендә баш бала булып дөньяга килгәнмен. 11 яшем тулганчы бик бәхетле яшәдем. 3нче классны тәмамлавым 1941 елга туры килде. Иртәнге якта, коедан су алган чагым иде, кемнеңдер авыл урамы буенча: «Сугыш! Герман сугыш башлаган!» – дип атта чапканы хәтердә. Авылдашлар өйләреннән чыга, кемдер елый, кемдер сугышны каргый. Мәктәптә, өч көн рәттән аңлату эшләре алып бардылар. Аннан инде көн саен ир-атлар сугышка китә башлады. Әткәй, Гайнетдин Бәшәров, август аенда лобогрейка (уру җайланмасы) белән урак ура башлаган гына иде, энесе Әгъләметдин абый белән икесен дә фронтка җибәрделәр. Әткәй урынына лобогрейкада сеңелесе Наибә калды. Әткәйләрне башта Суслонгерда тоталар. Алты айдан соң фронтка алалар.

Быел 27 гыйнвар көнне Ленинград блокадасы өзелүгә 76 ел булды. 1925 елда Боерган авылында туган сугыш ветераны Кыяметдин Минһаҗетдин улы Минһаҗев Ленинград блокадасын өзүдә катнашкан. Күрсәткән батырлыгы өчен 1942 елның 22 декабрендә «Ленинград оборонасы өчен» медале белән бүләкләнә. Изге җиребезне илбасарлардан саклап калган, аның иминлеге өчен гомерләрен дә кызганмаган каһарманнар рухлары алдында хөрмәт белән баш иябез, күңелләрдә истәлекләрен яңартабыз. 1945 елның февралендә яраланып авылга кайткан, янар йөрәкле, җырга моңга сәләтле, гаярь солдат үзенең гаилә тормышын да кыю гамәлдән башлый. Мал табибәсе булып эшләгән Наҗия исемле чибәр кызны урлап алып кайта. Алар бик матур итеп яшәп китәләр, 7 бала тәрбияләп үстерәләр.

2019 ел район терлекчелеге елъязмасына отышлы елларның берсе булып кереп калыр, чөнки узган елда терлекчеләребез шактый уңай нәтиҗәләргә иреште.  Моны дәлилләүче саннарны дүшәмбе көнне район хакимиятендә үткән киңәшмәдә авыл хуҗалыгы һәм азык-төлек идарәсе башлыгы вазифаларын башкаручы Ирина Гарипова җиткерде. 

2019 ел Тукай районында шәхси ярдәмче хуҗалыкларга ярдәм елы буларак игълан ителгән иде. Ел дәвамында район хакимиятендә авыл эшкуарларына дәүләт субсидияләрен алуда ярдәм итү буенча махсус комиссия эшләде. Ул авыл кешесенә кирәкле документларны тупларга ярдәм итү, проектларны яклау, гомумән, юридик хезмәт күрсәтү белән шөгыльләнде. Ел азагында мондый үзара киңәшләшеп эшләүнең нәтиҗәсен күреп була. 18 гаилә 5 млн 800 мең сум күләмендә дәүләт субсидиясе алды. Бу ярдәм хисабына 18 кече ферма төзелде, киләчәктә савым сыерларның баш саны артуы көтелә. 

Бүген районның авыл хуҗалыгы предприятиеләрендә тулы куәтенә техника ремонтлау бара. Авыл хуҗалыгы һәм азык-төлек идарәсенең механикалаштыру буенча консультанты Газинур Хөснуллин хәбәр иткәнчә, районда барлыгы 244 данә чәчкеч, 32 чәчү комплексы, 210 культиватор, 4089 тырма, 542 трактор исәпләнә. Чәчүдә катнашасы техниканы 1 мартка ремонтлап бетерү бурычы куелса да, район аграрийлары тырмалар төзекләндерүне декабрь аенда, культивация агрегатларын январь аенда тәмамларга планлаштыралар. 

8 февраль көнне районың барлык авыл җирлекләрендә, республика акциясенә кушылып, чираттагы мәртәбә чаңгы ярышлары уздырылды. Әлеге чара районда физкультура-сәламәтләндерү хәрәкәтен үстерү, халыкны актив ял итүгә тарту максатларын күздә тотып оештырыла. 

22 февраль көнне Яңа поселогы спорт мәктәбе базасында районның авыл җирлекләре, оешмалары һәм предприятиеләре арасында II Спартакиада старт ала

8 февральдә районның барлык авыл җирлекләрендә «Татарстан чаңгы юлы – 2020» массакүләм чаңгы ярышлары узачак.

Районыбызда 2019-2020 еллар сезонында ТР «Мәктәп волейбол лигасы»ның муниципаль этабы турнирлары үтә.

Легендар җырчы Илһам Шакиров хакында байтак китаплар дөнья күрде, матбугатта да бик күп язылды һәм язылып тора. Шулай булуга карамастан, кызыклы мәгълүматлар табылып тора. Якын кешеләре – туганнары сөйләгән истәлекләр аеруча кадерле. Зәй районы Дүрт Мунча авылында легендар җырчының бертуган апасы – Зәйнәп Гыйльметдин кызы Гәрәева яши. Туксан бер яшьлек Зәйнәп апа үз улы кебек якын күргән энесе хакында җылы истәлекләре белән уртаклашты. 

Күзкәй мәктәбе тарихы талантларга бай... Язучылар Рәшит Гәрәй, Фәннур Сафин, Салисә Гәрәева, кыска хикәяләр остасы Габделхәй Сабитов төрле елларда безнең авыл мәктәбен тәмамлаганнар. Без аларны һәрвакыт горурлык белән искә алабыз, иҗатларын өйрәнәбез, чараларда шигырьләрен файдаланабыз.

Язучы, драматург, җәмәгать эшлеклесе Туфан ага Миңнуллин – безнең чорыбызның иң кыю һәм дә тирән фикерле әдибе. Аның көн кадагына туры китереп әйткән зирәк фикерләре, төпле уе, халкы өчен янып-көеп яшәве безнең чор кешеләренә генә түгел, ә бәлки киләчәк буыннар өчен дә кыйммәтле хәзинә. Аның дөньяны нинди төсмерләрдә күрүе, нәрсә уйлавы, кешелекне нәрсәгә өндәве барысы да аның сәхнә әсәрләрендә. Халык театрлары шуңа да аның әсәрләренә еш әйләнеп кайта, алай гына да түгел театрлар күпчелек аның сәхнә әсәрләрен куялар. Татар мәдәниятенең һәм әдәбиятының алтын фондына кергән әсәрләре белән Туфан ага Миңнуллин мәңге безнең күңелләребездә сакланыр. Юк, ул бөтен тереләрдән дә тере, чөнки ул безне яшәргә өйрәтә. Аның шаян да, кинаяле дә, могҗизалы да язмалары әле безне бик озак тәрбияләр. Ярый әле безнең шундый әдипләребез туып тора. Алар бер-берләрен тулыландырып, татар сәнгатен һаман биеккә, үргә күтәрәләр, Әлдермештәге Әлмәндәр карттай мәңге үлмәс итәләр!

Район педагоглары «Ел укытучысы-2020» һәм «Иң яхшы татар теле укытучысы» бәйгесенең зона турында катнаштылар. Чара Яр Чаллыда узды.

Татарстанда 2022 елга кадәр полилингваль белем бирү комплекслары челтәрен булдыру проекты тормышка ашырыла. Әлеге проект РФ Президенты Владимир Путин тарафыннан да хуплау тапты. Ул балаларга татар, рус hәм инглиз телләрендә белем бирүне күздә тота. Укыту комплексына балалар бакчалары, мәктәп, өстәмә белем бирү учреждениеләре дә керә. Күптелле укытуны оештыру мәсьәләсе турында август киңәшмәсендә Тукай районы башлыгы Фаил Камаев та аерым басым ясады. Ул балаларга бакча яшеннән үк полилингваль укытуны, аерым алганда, дөньякүләм тел – инглиз теленә өйрәтүне югары дәрәҗәдә күтәрү бурычын куйды. Бу юнәлештә Теләнче Тамак авылының «Акчәчәк», Боерганның «Кызыл калфак», Сосновый Бор поселогының «Солнышко», Новотроицкоеның «Ромашка» балалар бакчаларында телләр өйрәтү буенча укыту программалары эшли башлады.