Татарстан юлларында мотопатрульләр эшли башлады

Мототөркемнәрнең төп бурычлары — юл хәрәкәте кагыйдәләренең үтәлешен тикшерү, мотошлемнар куллануны контрольдә тоту, шулай ук мототранспорт йөртүчеләрнең документларын карау. Инспекторлар аеруча балигъ булмаганнарның мотоцикл йөртүенә һәм исерек хәлдә транспорт белән идарә итү очракларына игътибар бирәчәк.

Кизү торуга чыкканчы мотопатрульләр мәҗбүри инструктаж үтә. Анда аларга юллардагы оператив хәл турында мәгълүмат җиткерелә һәм юл хәрәкәте кагыйдәләрен бозуларны ачыклау һәм кисәтү тәртибе аңлатыла.

Хәзерге вакытта Татарстан буенча Эчке эшләр министрлыгының ЮХИДИ структурасында 37 хезмәткәр мотоциклларда эшли. Бу юлларда контрольне арттырырга һәм юл-транспорт һәлакәтләре булган очракларда тиз арада тиешле чаралар күрергә мөмкинлек бирә.

Шулай ук яңа кадрлар әзерләү дә дәвам итә: 36 инспектор мотоцикл йөртү буенча укулар уза. Имтиханнарны тапшырганнан соң алар да патруль хезмәтенә керешәчәк. Димәк, экипажлар саны артачак, шуңа бәйле рәвештә, юлларда контроль дә көчәячәк.

Мотоэкипажлар рейдларда актив кулланыла. Аларның төп өстенлеге — шәһәрдәге тыгыз транспорт агымында тиз йөрү мөмкинлеге. Бу юл һәлакәтләре урыннарына оператив рәвештә барып җитәргә, кагыйдә бозуларны теркәргә һәм катлаулы шартларда хәрәкәтне көйләргә ярдәм итә.

Мотопатруль хезмәтен үстерү — Татарстан Дәүләт автоинспекциясенең юлларда иминлекне арттыруга һәм юл вакыйгаларына оператив җавап бирүне яхшыртуга юнәлдерелгән комплекслы эшенең бер өлеше.