Максат – юлдагы фаҗигаләрне киметү

Һәр елны ноябрь аеның өченче якшәмбесендә юл-транспорт һәлакәтләре корбаннарын искә алу көне билгеләп үтелә.

Агымдагы елның тугыз аенда республика юлларында, 4 меңгә якын юл-транспорт һәлакәте теркәлгән. Аларда 453 кешенең гомере өзелгән, 5 меңнән артык кешегә төрле җәрәхәтләр алып больницага ятарга туры килгән. Узган елның шушы чорындагы саннар белән чагыштырганда бераз кимү күзәтелсә дә, юллардагы хәл катлаулы кала бирә. Юл хәрәкәте куркынычсызлыгы бүген дөньякүләм игътибарда. Юл-транспорт һәлакәтләре рухи һәм физик зыян гына салып калмый, икътисадый һәм социаль югалтуларга да китерә. Әлеге проблемага җәмәгатьчелекне тарту, юлларда үлемнәрне һәм сәламәтлеккә зыян алуларны киметү һәм һәлакәтләрдә үлгәннәрне искә алу йөзеннән, район ЮХИДИ бүлеге 10 ноябрьдән 19ына кадәр төрле чаралар үткәрә.