Руслан Галиев: «Тестлар күләме аз, арттырырга кирәк»

Комиссия эшендә район прокуроры Руслан Галиев, хокук саклау органнары, сәламәтлек саклау, мәгариф һәм мәдәният вәкилләре катнашты.

Доклад белән Тукай район үзәк хастаханәсе баш табибы Розалия Лмарь чыгыш ясады. Ул наркология хезмәтенең 2024 елдагы эш нәтиҗәләре турында сөйләде, хроник алкоголизм белән диспансер учетында 251 кеше тора, ә профилактик учетта – 25. Наркология линиясе буенча диспансерда – 52 кеше, профилактикада 53 кеше исәптә тора. Хастаханә табиблары алкогольне чиктән тыш күп кулланучылар белән актив эшлиләр, кирәкле медицина ярдәме күрсәтәләр.

Утырышта яшьләр арасында наркоманияне профилактикалау мәсьәләләренә аерым игътибар бирелде. 2024 елда район мәктәпләрендә 234 укучыга наркотик матдәләр куллану буенча тест үткәрелде һәм уңай нәтиҗәләр табылмады. Әмма прокурор Руслан Галиев тестларның җитәрлек күләмдә булмавын билгеләп үтте: 2025 елга нибары 50 тест каралган, бу 4000нән артык укучыны колачлый алмый. Ул район администрациясенә һәм медицина учреждениесенә мәктәп укучылары өчен тестлар санын арттырырга тәкъдим итте.

Хокук саклау ведомствосының эше турында Россия Эчке эшләр министрлыгының Тукай районы буенча бүлегенең җинаятьчеләрне эзләү бүлеге начальнигы, полиция майоры Динар Кәлимуллин сөйләде. Аның сүзләренә караганда, 2024 елда 4 наркоҗинаять теркәлгән, 11е тикшерелгән, 2се туктатылган. 3 кешегә наркоманиядән дәвалану бурычы билгеләнгән. Шул ук елда наркотик исерүгә 28 тикшерү уздырылган.

Прокурор Руслан Галиев күтәргән мөһим мәсьәлә – язгы каникул чорында балигъ булмаганнарның ялын тәэмин итү. Ул мәктәпләрдә, балалар һәм мәктәп яны лагерьларында балаларның ялын оештыруда актив катнашырга, шулай ук кичке вакытта аларның үз-үзләрен тотышын тикшереп торырга кирәклеген билгеләп үтте. Прокурор 18 яшьтән кечерәк затлар өчен тыелган алкоголь продукциясен һәм энергетик эчемлекләрне сатуны контрольдә тоту даими булырга тиешлеген ассызыклады һәм гади хисапларга түгел, ә гамәлләргә чакырды.

Утырыш нәтиҗәләре буенча районда наркоманияне һәм алкоголизмны профилактикалауга юнәлдерелгән оештыру чаралары комплексын күздә тоткан карар кабул ителде, шул исәптән бәйлелеккә ия затларны иртә ачыклау һәм аларга үз вакытында ярдәм күрсәтү өчен профилактик эшне активлаштырырга, мәктәп укучылары арасында наркотикларның законсыз әйләнешендә катнашуның хокукый нәтиҗәләре турында аңлату чаралары үткәрергә, шул исәптән онлайн-форматта сәламәт яшәү рәвешен популярлаштыру һәм яшьләрне спорт һәм мәдәният эшчәнлегенә җәлеп итү.