Кышны озаттык, май чаптык

Чара Татарстанда милли мәдәниятләр һәм гореф-гадәтләр елы башлануга багышланды. Әлеге халык бәйрәмендә район башлыгы Фаил Камаев, аның урынбасарлары Рөстәм Закиров, Илфак Бариев, Башкарма комитет җитәкчесе Айрат Хәбибуллин, Совет аппараты җитәкчесе Гөлназ Галишина һәм башка администрация вәкилләре катнашты. Тукайлылар һәм район кунаклары да бәйрәмгә бик теләп килде.

Тукай районының 23 авыл җирлеге бәйрәмгә ярминкәләр белән чыккан иде. «Сәүдәгәрләр» ярминкә мәйданына килүчеләрне матур милли киемнәрдән, бизәкле шәльяулыклардан, җырлап, баянда уйнап, дәртле көйләр белән каршы алды. Сәүдә рәтләрендә ниләр генә юк иде: агач эшләнмәләре, бәйләнгән башмаклар, оекбашлар, бияләйләр, чәйнек каплый торган курчаклар, чәч каптырмалары, йомшак уенчыклар һәм район осталары ясаган башка декоратив-гамәли сәнгать әйберләре. Шулай ук ярминкәдә шәхси хуҗалыклардан азык-төлек тә тәкъдим ителде: казлар һәм үрдәк түшкәләре, яшелчәләр, тавык йомыркалары, консервланган ризыклар. Сыйланыр өчен бик күп тәм-томнар әзерләнгән иде: баллы әтәчләр, төрле бәлешләр, күмәчләр, өчпочмаклар һәм, әлбәттә, Май чабу бәйрәменең төп атрибуты – коймаклар һәм төрледән-төрле өй кайнатмалары. Биредә тәмле исләр чыгарып, кызартып коймак та пешерделәр, утын мичендә пылау әзерләделәр һәм самавырга күмер салып, чәй кайнаттылар. Һәр авыл җирлегенең диярлек ярминкә өстәленә куелган бизәкле савыт-саба һәм бауга тезелгән келиндерләр бәйрәм атмосферасына үзенчәлекле рух өстәде.

Чарада мастер-класслар, әйлән-бәйлән, уен түгәрәкләре оештырылды. Спорт яратучылар аркан тартышуда, капчык киеп йөгерүдә, себерке өстенә атланып чабу кебек шаян уеннарда көч сынаштылар.

Бәйрәмне Шилнәбаш мәдәният йортыннан «Нивушка» һәм Круглое Поле поселогыннан «Родные напевы» фольклор коллективлары, шулай ук район җырчылары Марина Орлова, Мария Маратаева, Евгений Анискин, Полина Понасенкова бизәде. Рус халык бәйрәменә шулай ук Яр Чаллының «Энергетик» мәдәният сараеннан «Вольница» фольклор коллективы чакырылды. Артистларның һәр чыгышын тамашачылар көчле алкышлар белән каршы алды.

Бу көнне Круглое Поле поселогына килгән һәр кунак район бәйрәменнән матур тәэсирләр һәм яхшы кәеф алып китте.

Гүзәл Мәрдәнова

/ Фотолар район мәдәният һәм ял үзәгеннән алынды.