Яхшылыкның чиге юк

Олышилнәлеләр безнең сугышчыларга махсус хәрби операциянең беренче көннәреннән үк ярдәм итә башлады, һәркем булдыра алганча үз өлешен кертергә тырышты.

2023 елның 20 сентябрендә авылда яшәүче Лариса Глухова волонтерлык хәрәкәтен оештырып җибәрә. Әлеге филиал Лариса  Михайловнаның «Чаллы челтәрләре» оешмасы волонтеры Наилә Гудовских белән танышу нәтиҗәсендә барлыкка килә. Аннары Лариса Глуховага Галина Бибикова да кушыла, ул бу изге эштә катнашырга теләүче авылдашларны барларга булыша.

Волонтерлар авыл клубына җыела, эш нәкъ менә шушында кайный. Районыбызның башка авылларындагы кебек үк, нигездә, үз эшләрен калдырып, пенсионерлар килә. Олы Шилнәнең хезмәт сөючән халкы ни генә ясамый: блиндаж шәмнәре, үлән чәйләре һәм киптерелгән яшелчәләр тутыра, маскировка челтәрләре һәм махсус «Леший» костюмы өчен тасмалар, яңгырдан саклый торган плащлар һәм эчке киемнәр кисә, коры душ әзерли – эшләре санап бетергесез.

Шулай ук биредә материал һәм сугышчылар өчен кирәкле товарлар сатып алу өчен акча да җыялар. Ярдәмне алгы сызыкта булган сугышчыларыбыз язмышына битараф булмаган Олы Шилнә, Кече Шилнә, хәтта Чаллы халкы да күчерә. Акчаларның бер өлешенә, мәсәлән, окоп шәмнәре өчен парафин, чәй, оекбашлар сатып алынса, бер өлешен алар кирәкле материаллар сатып алу өчен «Чаллы челтәрләре» оешмасына күчерә, билгеле бер сумма госпиталь өчен медикаментлар сатып алу һәм солдатлар өчен исемле посылкалар җыю белән шөгыльләнүче төркемгә җибәрелә. Әлеге волонтерлык оешмасының бөтен эшчәнлеге – күз алдында, катгый хисап алып барыла: күпме акча кергән, күпме һәм нәрсәгә тотылган, күпме калган.

«Барлык үзәкләр дә тулы көченә челтәрләр үрә һәм материаллар сатып алырга акча җитми. Зур үтенеч: волонтерларга ярдәм итегез, хәрбиләребезнең тормышы шуңа бәйле бит», – дип мөрәҗәгать итә тукайлыларга волонтер, Олы Шилнә китапханәсе мөдире Светлана Карцева. – Җибәрелгән һәр челтәргә, исемле посылкага һәрвакыт кире элемтә килә, хәрбиләребез ярдәм күрсәтүчеләргә чын күңелдән рәхмәт әйтә», – дип өстәп тә куя.

Клубта шулай ук сугышчыларга җибәрү өчен барлык кирәкле әйберләрне җыю пункты да бар. Теләге булган һәр кеше медикаментлар, шәхси гигиена предметлары, урын-җир әйберләре, мендәрләр, юрганнар, футболкалар, оекбашлар, кыр госпитальләре өчен ыштаннар алып килергә мөмкин. Боларның барысы да алга таба гуманитар йөк составында алгы сызыкка озатыла.

Һәр волонтер, нигездә, билгеле бер эш башкара – зур производстводагы кебек. Мәсәлән, Наталья Муханова кисә, Татьяна Арефьева тегә. Павел Мордвинов йөк ташу белән шөгыльләнә. Николай Барышев шулай ук бик кирәкле эш башкара – ул кайчы үткенләү өчен җаваплы. Сания Кыямова, Нина Бельсунова, Лилия Марченко, Елена Секерина бәйләү белән шөгыльләнә. Бәйләүчеләргә җепне Яр Чаллының 26 нчы гимназиясе биргән – һәркем, кайда яшәвенә карамастан, булдыра алганча ярдәм итә, чөнки яхшылыкның чиге юк.  Бер газета мәкаләсендә махсус хәрби операциядә катнашучылар өчен ярдәм оештыруда катнашкан барлык кешеләрне санап бетереп булмый, Олы Шилнәнең волонтерлык оешмасында алар – 30дан артык. Барысы да – олы йөрәкле кешеләр.

«Матди яктан ярдәм иткән, изге эш өчен вакытын һәм көчен кызганмаган һәр кешегә, шул исәптән, ярдәм кулы сузган Чаллы гимназиясенә рәхмәт белдерәбез. Без җиңүне һәм сугышчыларның исән-сау кайтуларын көтәбез», – ди Светлана Карцева.