Гомерне озынайтучы күнегүләр бар!

Аерым физик күнегүләрнең гомерне озайтырга сәләтле икәнлеген Техас университетының Көньяк-көнбатыш медицина мәктәбе галимнәре дәлилләгән.

Тикшеренү барышында шул да ачыкланган: 20 көн түшәктә ятып авыручыларның физиологик билгеләре үзләреннән ике тапкыр өлкәнрәк кешеләрнеке дәрәҗәсенә җиткән, аларның тәнендә мускул күләме азайган, ә менә май катламы калынайган. Бу пациентларның аз гына көчергәнештән дә кан басымы күтәрелгән, йөрәк тибеше күпкә ешайган. Аларга организмнарын элекке халәтенә кайтарыр өчен аз-азлап кына булса да спорт белән шөгыльләнә башлау кирәклеген ассызыклаган белгечләр.

Ә менә күнегүләргә килгәндә, велоспорт белән шөгыльләнү, йөгерү һәм көн дә саф һавада йөрү адәм баласын яшәртә, гомерен озынайта, ди галимнәр. Аларның йөрәк һәм кан тамырларына аеруча файдалы икәнлеге ачыкланган.

Фото: ruszabeg.ru