“Дамские пальчики” — телеңне йотарлык десерт

Камыр өчен кирәк булачак:

• 1,5 стакан су
• 180 гр ак май 
• бик аз гына тоз
• 1,5 стакан он
• 6 йомырка

Әзерләү тәртибе

Суга ак майны вак кисәкләргә бүлеп салыгыз, аз гына тоз өстәп, утка куегыз. Кайнап чыкканнан соң, утны киметеп, болгата-болгата он салыгыз. Камырны якынча 5 минут пешереп алыгыз.

Аннары массаны уттан алып, агач кашык белән яхшылап болгатып, суынырга калдырыгыз. Камыр суынгач, йомыркаларны берәм-берәм кушып, һәрберсен яхшылап болгатыгыз.

Әзер камырны кондитер капчыгына салып, пергамент җәелгән табага бармак озынлыгында итеп сыгып чыгарыгыз.

180 градуска кадәр җылытылган мичтә якынча 40 минут пешерергә кирәк булачак. Иң мөһиме — беренче 15–20 минутта мич ишеген ачмагыз, югыйсә кабарган камыр кире төшеп китәргә мөмкин.

Крем өчен:

• 750 гр 20%лы каймак
• 1 стакан шикәр комы

Каймак белән шикәрне миксер ярдәмендә куерганчы туглагыз.

Десертны җыю

Пешкән “бармаклар”ны кремга манып алып, матур итеп савытка тезегез. Өстенә вакланган шоколад сибеп бизәргә мөмкин.

Тәмле булсын!