Чәй табынында - урама
Өстәлләрегезгә бәйрәм төсе керсен дисәгез, бергәләп урама пешереп алыйк.
Камырны әзерләү өчен 3 йомырка, бер чеметем тоз, бер чеметем шикәр, он һәм үсемлек мае кирәк булачак.
Башта камырны яхшылап басабыз. Аны ике өлешкә бүлеп, пакет эченә салып, 30 минутка ял итәргә калдырабыз. Ял иткән камырны юка итеп җәябез. Аннары аны тыгыз итеп рулет рәвешендә төрәбез һәм тагын пакетка салып 30 минутка калдырабыз.
Икенче тапкыр ял иткән камырны мөмкин кадәр нечкә итеп — хәтта үтә күренмәле дәрәҗәгә җиткәнче җәябез. Пычак яки камыр кискеч ярдәмендә якынча 5 см киңлектә тасмалар кисәбез. Һәр тасманы артык тыгыз итми генә спираль рәвешендә төрәбез. Әзер өлешләрне кипмәсен өчен бераз дымлы сөлге астында тотарга яки пленка белән каплап торырга кирәк.
Тирән савытта үсемлек маен яхшылап кыздырабыз. Ураманы нечкә агач таякчыклар (шпажка) белән тишеп, кайнар майга салабыз. Урама таралмый гына пешсен дисәгез, ике таякчык белән эшләргә кирәк. Алтынсу төскә кергәнче әйләндерә-әйләндерә кыздырабыз.
Әзер ураманы артык маен сеңдерсен өчен кәгазь салфеткаларга куябыз. Суынгач, өстенә мул итеп шикәр оны сибәбез.
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Нет комментариев