Татарстан кадет корпусы укучылар кабул итә

Кадетлар 7 кешелек бүлмәләрдә яши, һәркайсында аерым санузел, душ, кием саклау урыны һәм Wi-Fi бар. Моннан тыш, ял итү һәм психологик бушану өчен махсус бүлмәләр дә булдырылган. Корпус территориясендә бассейнлы физкультура-сәламәтләндерү комплексы, универсаль спорт мәйданчыклары һәм «воркаут» зонасы урнашкан.

Уку корпусы заманча җиһазлар белән тәэмин ителгән: барлык кабинетларда проекторлар һәм сенсорлы панельләр куелган. Химия, физика, биология фәннәре өчен лабораторияләр һәм практик дәресләр үткәрүгә җайлаштырылган махсус җиһазлар бар. Шулай ук робототехника, аудиовизуаль технологияләр лабораторияләре, фото-видеостудияләр, медиатека һәм китапханә эшли.

Укучыларның буш вакытын файдалы үткәрү өчен өстәмә белем бирү программалары тәкъдим ителә. Алар шәхесне төрле яклап үстерүгә һәм хәрби яки гражданлык югары уку йортларына әзерләүгә юнәлтелгән. 30дан артык түгәрәк арасында волейбол, бокс, армия кул сугышы, йөзү, шахмат, сәнгать юнәлеше, авиация һәм ракета модельләштерү кебек юнәлешләр бар.

Төп гомуми белем баскычына сайлап алу 2–10 июньдә, ә урта гомуми белем өчен 22–26 июньдә узачак. V сыйныфка — 50, VI сыйныфка — 5, X сыйныфка 30 укучы кабул итү планлаштырыла. Кабул итү шартлары, кирәкле документлар һәм имтиханнар турында тулы мәгълүмат рәсми сайтта бирелгән.

Моннан тыш, Идел буе федераль округында башка кадет корпуслары да укучылар җыя. Алар арасында В.Г. Стариков исемендәге Удмурт кадет корпусы, А.В. Кочетов исемендәге Чуваш кадет корпусы, В.Ф. Маргелов исемендәге Түбән Новгород кадет корпусы һәм башкалар бар.