Тукай районы үзәк хастаханәсендә Халыкара өлкәннәр көненә багышланган бәйрәм концерты узды. Тантанада медицина өлкәсендә озак еллар намуслы хезмәт куйган сәламәтлек саклау ветераннарына рәхмәт сүзләре җиткерелде һәм истәлекле бүләкләр тапшырылды.
Сәламәтлек саклау ветераннарын бу күркәм һәм мөһим бәйрәм белән хастаханәнең баш табибы Розалия Лымарь котлады. Ул үзенең чыгышында өлкән буынга фидакарь хезмәтләре, бәяләп бетергесез тормыш тәҗрибәсе һәм зирәклекләре өчен тирән рәхмәтен белдерде. Баш табиб ветераннарга игътибар һәм кайгыртучанлык күрсәтү хастаханә эшчәнлегенең иң өстенлекле юнәлешләренең берсе булып калачагын аерым билгеләп үтте. Тирән хөрмәт билгесе буларак, килгән кунакларның һәркайсына истәлекле бүләкләр өләшенде.
Чарага бәйрәмчә ямь һәм якты хис-кичерешләрне районыбызның мәдәният бүлеге артистлары бүләк итте. Иҗат коллективлары әзерләгән әлеге чара тамашачыларның берсен дә битараф калдырмады. Залда ихлас елмаюлар, дәррәү алкышлар һәм рәхмәт сүзләре тынмады.
Нет комментариев