Татарстан студентлары шәһәр урамнарын кардан чистартуга әзер

Татарстанда идарә компанияләре кызыксыну күрсәтсә, урамнардагы карны чистартуга студент отрядлары җәлеп ителергә мөмкин. Бу хакта республика Министрлар Кабинетында узган брифингта Татарстан яшьләр эшләре министры Азат Кадыров хәбәр итте, дип яза Татар-Информ.

Министр сүзләренчә, кар күп яуганлыктан студентларны кар чистарту эшләренә җәлеп итү мөмкинлеге бар. Әгәр идарә компанияләре хезмәттәшлеккә әзер булса, министрлык процессны оештыруда ярдәм күрсәтергә әзер. Азат Кадыров билгеләп үтүенчә: хәзерге вакытта күп кенә яшьләр оешмалары һәм студент отрядлары социаль объектлар һәм өлкәннәр яшәгән йортлар тирәсендәге карны чистартуда катнаша.

Республика студентлар хезмәт отрядлары үзәгенең директоры Василий Ислаев яшьләрнең мондый эшләргә әзер булуын раслады. Кайбер урыннарда студентлар инде ярдәм күрсәтә дип искәртте ул һәм шәһәр урамнарында эшләү тәкъдимнәрен кабул итәргә әзерлеген белдерде.

Бу эштә сүз волонтерлык хакында түгел, ә хезмәт мөнәсәбәтләре турында бара: студент отрядлары идарә компанияләре белән килешү нигезендә карны чистартуга чыга ала.