Россиядә яшүсмерләр рәсми рәвештә эшкә урнашкан очракта 14 яшьтән үк булачак пенсияләре өчен стаж һәм хокуклар туплый башлый ала. Бу хакта РИА Новостига Президент академиясе эксперты Татьяна Голубева сөйләгән.
Аның сүзләренчә, 14 яшькә җиткән балигъ булмаганнарга законда каралган шартларны үтәгәндә эшләргә рөхсәт ителә. Уку белән хезмәтне бергә алып барган очракта, яшүсмерләр 18 яшькә кадәр үк хезмәт стажы туплап, киләчәктә пенсия күләменә йогынты ясый торган шәхси пенсия коэффициентларын формалаштыра ала.
Гадәттә, хезмәт килешүе 16 яшьтән төзелә. Әмма ата-ананың берсенең язмача ризалыгы булганда, 14 яшьлек яшүсмер дә рәсми рәвештә эшкә урнаша ала. Мондый очракта аңа бары тик сәламәтлеккә зыян китерми торган һәм укуга комачауламый торган җиңел эш башкарырга рөхсәт ителә. Эш вакыты дәресләрдән соң яки укудан буш вакытка туры килергә тиеш.
Балигъ булмаганнар өчен эш сәгатьләренә дә чикләүләр билгеләнгән. 16 яшькә кадәрге яшүсмерләр атнага 24 сәгатьтән артык эшли алмый. 16–18 яшьлекләр өчен атналык эш вакыты 35 сәгать белән чикләнә.
Әгәр яшүсмер уку елы вакытында эшкә урнашса, рөхсәт ителгән эш вакыты тагын ике тапкырга кими. Шулай итеп, эш белән укуны бергә алып бару өчен аерым кагыйдәләр гамәлдә.
Нет комментариев