«Республикада «Профессионаллар — 2026» төбәк этабы тәмамланды: 352 компетенция һәм 6 меңнән артык катнашучы»

Татарстанда 2026 елда узган «Профессионаллар» Бөтенроссия чемпионатының төбәк этабы рекордлы нәтиҗәләр күрсәтте. Ярышлар барышында 352 һөнәри компетенция тәкъдим ителде, бу чемпионат тарихында иң югары күрсәткеч булып санала. Әлеге проект «Яшьләр һәм балалар» илкүләм проектына керүче «Профессионалитет» федераль программасы кысаларында гамәлгә ашырыла. Бу хакта Профессиональ компетенцияләрне үстерү үзәге матбугат хезмәте хәбәр итте.

Үзәкнең генераль директоры Эмиль Гобәйдуллин билгеләп үткәнчә, 2025 елда чемпионат 329 компетенцияне үз эченә алган. Федераль оператор тәкъдимнәрен исәпкә алып, республикада юнәлешләр системасы яңартылган һәм программага 26 яңа компетенция өстәлгән. Алар арасында традицион һөнәрләр дә, заманча цифрлы технологияләр белән бәйле тармаклар да бар.

Чемпионат чараларында барлыгы 6 392 кеше катнашты. Алар арасында 1 932 конкурсант, шул исәптән 639 юниор, шулай ук эксперт-остазлар, баш һәм индустриаль экспертлар, методистлар, мәйданчыкларның техник администраторлары, озата баручылар һәм 1 400дән артык волонтер бар иде.

Төбәк этабында иң яхшы нәтиҗәләр күрсәткән катнашучылар Татарстан исеменнән төбәкара ярышларда чыгыш ясаячак. Чемпионат циклының финал өлеше Калуга, Түбән Новгород һәм Санкт-Петербург шәһәрләрендә узачак. Узган ел финал этапларында республиканы 52 конкурсант тәкъдим иткән иде.