Рамазан аенда ураза тоту кемнәргә фарыз

Ураза тотуның шартлары:

1. Мөселман булырга
2. Үз акылында булырга
3. Бәлигъ булырга.

Үз акылында булган һәм бәлигълык яшенә җиткән һәр мөселман ир, һәрбер мөслимә хатын Рамазан аенда ураза тотарга бурычлы. Бу – Аллаһның катгый әмере. Бәлигълык яшенә җитмәгән балага ураза тоту мәҗбүри түгел. Ләкин шул ук вакытта, баланы кече яшьтән ураза тотарга күнектерсәң яхшырак, әмма моны эшләгәндә баланың физик үсешенә зыян китермәскә кирәк.

Хатыннар хәез көннәрендә һәм бала тапканнан соң чистарыну көннәрендә ураза тотмыйлар, ләкин бу көннәр узгач, калдырган ураза көннәрен каза итеп тутырырга тиеш булалар.

Догалар

Ураза тотарга ният кылганда укыла торган дога:

“Нәвәйтү ән әсуумә саумә шәһри рамадаанә минәлфәҗри иләл-мәгъриби хаалисән лилләәһи тәгаләә”.

Тәрҗемәсе: Аллаһы Тәгалә өчен чын күңелдән ният кылдым ошбу көннең рамазан уразасын тотарга, таң атканнан алып кояш баеганчыга тикле.

Авыз ачканда укыла торган дога:

“Бисмилләһир-рахмәәнир-рахиим. Аллааһүммә ләкә сумтү, вә бикә әмәнтү вә гәләйкә тәүәккәлтү вә галәә ризкыйкә әфтартү, фәгъфирлии йәә гаффәәрү мәә каддәмтү вә мәә әххартү”.

Тәрҗемәсе: Әй, Аллаһым! Ошбу уразамны синең өчен генә тоттым һәм Сиңа гына иман китердем, вә Сиңа тәвәккәл кылдым; вә синең ризыгың белән авыз ачамын. Әй, гөнаһларны ярлыкаучы Раббым! Минем моңа кадәр кылган гөнаһларымны да, соңгыларын да ярлыкасаң иде.