2026 елның декабре өчен каралган кайбер балалар пособиеләре гадәттәгедән иртәрәк түләнәчәк. Акчалар банк счетларына гыйнварда түгел, ә декабрьнең соңгы көннәрендә күчереләчәк. Бу хакта ТАСС агентлыгына Дәүләт Думасы депутаты Алексей Говырин хәбәр иткән.
Вакытыннан алда түләү гадәти график буенча 2027 елның 3, 5 һәм 8 гыйнварында күчерелергә тиешле пособиеләргә кагыла. Алар арасында 17 яшькә кадәрге балаларга һәм йөкле хатын-кызларга бирелә торган бердәм пособие, бала яшь ярымга җиткәнче аны карау буенча түләү, шулай ук хәрби хезмәткә чакырылган хәрби хезмәткәрнең баласына билгеләнгән пособие бар.
Моннан тыш, өч яшькә кадәрге балаларга ана капиталыннан түләнә торган айлык акча да декабрь ахырында күчереләчәк. Бала яшь ярымга җиткәнче аны карау буенча пособие алучы эшләүче ата-аналар да түләүне вакытыннан алда алачак.
Әмма гыйнвар ае өчен билгеләнгән пособиеләр февральдә гадәти график буенча түләнәчәк. Депутат искәрткәнчә, пенсияләр һәм балалар пособиеләрен күчерү даталары төрле булырга мөмкин. Шуңа күрә һәр түләүнең үз графигына игътибар итәргә кирәк.
Пособие акчасын почта аша алучыларга китерү вакытын үзләренең почта бүлекчәсендә ачыкларга киңәш ителә. Төбәк дәрәҗәсендәге түләүләрнең даталары исә тиешле ведомстволарның графигына бәйле.
Нет комментариев