15–16 яшьтә эшкә урнашу тәртибе

Россиядә эш бирүче инициативасы белән балигъ булмаган хезмәткәрне дәүләт органнары ризалыгыннан башка эштән азат итү тыела. Бу хакта «Макс» платформасында РФ Хезмәт министрлыгы хәбәр итә, дип яза РИА Новости.

Ведомство аңлатуынча, яшүсмер белән хезмәт килешүен өзү бары тик дәүләт хезмәт инспекциясе һәм балигъ булмаганнар эшләре буенча комиссия ризалыгы белән генә мөмкин. Моннан тыш, мондый тәртиптән бары тик оешма ябылган яки индивидуаль эшмәкәр үз эшчәнлеген туктаткан очракларда гына тайпылу рөхсәт ителә. Шулай ук ведомствода билгеләп үтелгәнчә, яшүсмерне теләсә нинди вакытлы эшкә җәлеп иткәнче, аның белән мәҗбүри рәвештә хезмәт килешүе төзелергә тиеш.

14 яшькә кадәрге балаларга бары тик иҗади эшчәнлектә генә катнашу рөхсәт ителә — мәсәлән, кино төшерүләрдә, театр спектакльләрендә, цирк тамашаларында яки спорт чараларында чыгыш ясау. Ә инде 14 яшьтән башлап, яшүсмерләргә җиңел хезмәтнең кайбер төрләрендә эшләү мөмкинлеге ачыла.

Хезмәт килешүен рәсмиләштерү өчен ата-ананың берсенең, опекунның яки башка законлы вәкилнең ризалыгы кирәк (әгәр бала ата-ана каравыннан мәхрүм булса). Яшүсмер 15 яшьтән соң үзлектән хезмәт килешүе төзи ала, әмма бу бары тик җиңел эш төрләренә генә кагыла. 16 яшьтән исә ул ата-ана яки опекун катнашыннан башка да хезмәт килешүен мөстәкыйль рәвештә имзалау хокукына ия була.