Юлларда бер көндә өч мең кешенең гомере өзелә

БМО Генераль Ассамблеясы тәкъдиме белән һәр елны ноябрь аеның өченче якшәмбесе юл-транспорт һәлакәтендә үлгәннәрне искә алу көне буларак билгеләп үтелә. Акциянең максаты - юллардагы үлемнәр проблемасына игътибарны юнәлтү. Дөнья буенча һәр көнне юлда 3 мең кешенең гомере өзелә, 100 меңгә якын кеше җитди җәрәхәтләр ала. Бер елга исә үлүчеләр саны 1,3 миллионга, сәламәтлегенә зыян алучылар, инвалид калучылар саны 50 миллионга җыела. 15-25 яшьлекләрнең үлемендә юл-транспорт фаҗигаләре беренче сәбәп булып тора. Бөтендөнья сәламәтлек саклау оешмасы фаразларына караганда, 2020 елда юл һәлакәтләре, йөрәк-кан тамырлары һәм яман шеш авыруларыннан соң, үлемнәрнең өченче төп сәбәпчесе булачак. Бу акция район халкын да уйланырга мәҗбүр итсен, юлларда саклыкка чакырсын иде, дип кисәтә район ЮХИДИ бүлеге башлыгы Шамил Ганиев.

Фото чыганагы:belta.by