«Үз мәктәбеңә ярдәм ит!» акциясе дәвам итә

Районыбызда «Үз мәктәбеңә ярдәм ит!» республика акциясе кысаларында иганәчеләр мәгариф оешмаларына ярдәм күрсәтүне дәвам итәләр. Акция барышында Яңа Бүләк урта мәктәбенә «Татэлектромаш» җәмгыяте (генераль директоры Фаил Шәрифуллин) 450 мең сумлык ярдәм итте, мәктәпнең түбәсен алмаштырдылар, тәрәзәләр куелды. Мәктәпкәчә белем бирү оешмаларына да иганәчеләрнең ярдәме зур. Әйтик, Теләнче Тамак авылының «Акчәчәк» балалар бакчасында барлык тәрәзәләр алмаштырылды. Монда «Агрокөч Төркеме» җәмгыятенең генераль директоры Илдар Гыймадиев 483 мең сумга булышлык итте. Яңа поселогының «Каенкай» балалар бакчасында шулай ук яңа пластик тәрәзәләр куелды. 500 мең сумлык ярдәмне СМУ-26 җәмгыятенең директоры Һадый Бикиев күрсәтте.