Җәй ахырында бакчада ниләр эшләргә?
Август – бакчачылар өчен кызу вакыт. Бу айда бакчачылар үстергән уңышны җыя, яшелчә культураларын кабат утырта, туфракны савыктыра, чүп үләннәренә, көндезге һәм төнге күбәләкләргә каршы көрәшә, түтәлләргә су сибә. Август аенда алма, груша, алыча, облепиха һәм соңгы чия сортлары өлгереп килә. Миләш өлгерә, карлыган һәм крыжовник җимеш бирә. Уңышны җыеп алу өчен коры, аяз көнне сайларга кирәк. Бәрәңге казып алырга теләгәндә аны кояшта яхшылап киптерү мөһим. Августның беренче декадасында яшел тәмләткечләр, төсле кәбестә, брокколи, кәбестә, татлы борыч, фасоль уңышын җыялар.
Уңышы җыеп алынган түтәлләргә кабат нәрсә утыртырга?
Ай уртасында редиска утыртырга була. Салат, укроп, петрушка кебек яшел тәмләткечләрне чәчү өчен иң яхшы вакыт шулай ук август уртасы. Борчакның тиз өлгерешле сортларына өстенлек бирегез, алар инде ай ярымнан соң ук уңыш китерәчәкләр. Августта шулай ук пекин кәбестәсен утыртырга була. Культуралар утыртырга теләмәгән очракта бушаган урынга туфракны пар астында калдырырга мөмкин. Мөмкин булганча, мондый туфракны чүп үләннәреннән арындырырга кирәк.
Август – туфракны савыктыру вакыты
Август аенда туфракны савыктыру буенча чаралар үткәрергә кирәк. Моның өчен сидераль культуралар: горчица, арыш, люцерна һ.б. чәчү зарур. Бу бигрәк тә балчык туфрак өчен файдалы булачак. Комлы туфракка килгәндә, сидератлар аны тамыр системасы белән ныгытачак. Туфракны юудан һәм йомшартудан саклауны үсемлекләрнең яфраклары һәм сабаклары тәэмин итәчәк, алар исә җирне яру һәм киптерүгә юл куймаячак.
Ни өчен чүп үләннәреннән котылырга кирәк?
Бакча һәм бакча яны участокларында чүп үләннәренең күп төрлесе үсә, шуңа күрә алар белән даими рәвештә көзгә кадәр көрәшергә кирәк. Агротехник алымнар куллану – йомшарту, туфракны эшкәртү, тамыр системасы белән бергә чүп үләннәрен казып алу һәм бетерү кирәк. Чүп үләннәреннән арыныр алдыннан үсемлекләрне карарга кирәк, чөнки алар бакчачыга туфрак торышы турында мәгълүмат бирә. Югары дымлылык турында солыча сөйли. Күп күләмдә ромашка булган очракта, кырларга известьлау үткәрергә туры киләчәк, чөнки туфрак әче дигән сүз.
Җиләк-җимеш агачларын тукландырырга вакыт
Бакчада бу вакытта җиләк-җимеш агачларында киләсе ел уңышына нигез салына. Аларны фосфор һәм калий белән тукландырырга вакыт. Август азагы-сентябрь башында җиләк, сирень, можжевельник, чия, кызыл карлыган утыртырга мөмкин.
Август аенда нинди культураларга су сибү кирәк?
Август аенда, корылык булмаса, барлык яшелчә культураларына, кыяр, кәбестә, кишер, чөгендердән башка су сибү тәмамлана. Бигрәк тә кишер түтәлләрендәге туфракның дымлылыгын игътибар белән күзәтергә кирәк. Дым җитмәгән очракта һәм су даими сибелмәсә тамыразык ярыла.
Агачларга су сибү акрынлап кими, әмма туктатмау мөһим. Җиләк-җимеш куаклары дымга мохтаҗ, чөнки аларда киләсе ел уңышы өчен чәчәк бөреләре формалаша.
/Резеда Якупова фотолары
Следите за самым важным и интересным в Telegram-каналеТатмедиа
Нет комментариев