«Татар кызы – таң йолдызы» бәйгесе Динарага уңыш китерде

Бу бәйгегә кызлар барлык тырышлыкларын биреп әзерләнделәр: сәхнә, кулинар ризыклар, кул эшләре осталыгын арттырдылар, барлык номерларын кат-кат кабатладылар. Купшы милли киемнәр кигән гүзәл кызлар тамашачы алдына чыктылар һәм алкышларга күмелделәр.

Бәйге барышында мәртәбәле жюрига һәрбер кыз үзенең иҗади номерларын күрсәтте - кемдер җырлады, икенчеләре татар телендә сәнгатьле итеп шигырь сөйләде, кемдер татар халык биюен башкарды. Аш-су бәйгесендә кызлар һәрберсе үзе пешергән милли ризыкларны тәкъдим итте.

Район данын яклап, әлеге бәйгедә Иштирәк авылы гүзәле - Динара Гарифуллина чыгыш ясады. Динара үзе VIII сыйныфта белем ала. «Бәйгегә номерлар әзерләү, костюмнар эзләү, репетицияләр, мастер-класслар - минем өчен барысы да мавыктыргыч булды. Финалда көч сынашасы кызларны көндәшләр дип әйтеп булмый, чөнки бу вакыт эчендә барыбыз да дуслаштык, һәрвакыт бер-беребезгә булышлык күрсәтергә тырыштык», - ди Динара. Әле тагын болай дип тә өсти: «Жюрига тәкъдим итәсе номерым ошармы, юкмы дип бик нык дулкынландым. Минем һәрбер хәрәкәтне 800дән артык кеше күзәтә бит! Менә нәтиҗәләрне игълан итәләр. Әлеге хисләрне сүз белән аңлатып бетереп булмый! Менә минем исемне дә әйттеләр. Икенче урын! Мин бик шатландым, әлбәттә. Беренче чиратта бу җиңүем белән әниемә һәм апама бурычлымын».