Сара Садыйкова юбилее уңаеннан

С. Садыйкованың тормыш һәм иҗат юлы Чаллы ягы белән дә тыгыз бәйләнгән. Ул бу якларда еш кына гастрольләрдә булгалый, КамАЗ төзелеше елларында автогигантка шеф концертлары белән күп мәртәбәләр килә. Аның иҗатында Чаллыдагы бөек төзелеш, әлбәттә, урын таба: Сара апа талантлы шагыйрьләребез Рахмай Хисмәтуллин («Күңелләрдә таң шатлыгы»), Нияз Акмал («КамАЗым»), Әхмәт Рәшит («Чаллы батырлары») сүзләренә автозаводчылар турында популяр җырлар яза. Яр Чаллыдагы иң зур мәдәният йорты менә инде утыз ел дәвамында Сара Садыйкова исемен йөртә.

Бөек Сара апаның олуг юбилеена багышланган әдәби-музыкаль кичә Чаллыда яшәүче күренекле татар композиторы, Татарстанның атказанган мәдәният эшлеклесе Рубис Зариповның Сара апа сүзләренә язылган җыры белән башланды.

«Татар җыры сине юксына» диеп аталган зур концертта Казаннан килгән абруйлы мәдәният эшлеклеләре катнашты. Алар арасында Татарстанның халык артисты, КФУ профессоры Маргарита Коварская (фортепиано), Татарстанның халык артисты Зөһрә Сәхәбиева-Бигичева (вокал), Татарсанның атказанган артисты Гөлнара Мурзиева (сопрано), Татарстанның атказанган артисты Әхмәт Кәримов (баян), Халыкара конкурслар лауреатлары Ильяс Камалов (виолончель), Рушания Мушарапова (сопрано) һәм Арсений Коварский (флейта), Татарстан Дәүләт консерваториясенең баш концертмейстеры Илдар Арсланов (фортепиано) һәм башкалар катнашты. Шулай ук безнең якташыбыз, шагыйрь Мансур Сафин да бөек Сара Садыйковага багышланган шигырьләр циклын укыды.

Мәшһүр композиторыбыз Сара Садыйкованың шундый тантаналы зур юбилей концертлары шулай ук Казан, Мәскәү һәм Санкт-Петербург шәһәрләрендә дә узачак.

Михаил Загорский,
язучы.

Изге Сара апа белән

Мансур Сафин

Мәңгелеккә бүләгем

(Сара апа Садыйкова тавышы)

Мансур Сафин