«Сабан туе гүзәле-2016» район бәйгесе җиңүчесе – Алсу Сәлахова

26 май көнне Иске Абдул авылының мәдәният йортында «Сабан туе гүзәле-2016» район бәйгесе булып узды. Гүзәл исеменә Куадыдан Гөлшат Хәсимова, Иске Абдулдан Илзирә Фәрваева, Күзкәйдән Алия Асылмәрдәнова, Комсомолец поселогыннан Алсу Сәлахова һәм Яңа Бүләктән Инзилә Ахунова дәгъва кылдылар. Кызлар «Танышыгыз, бу мин», «Тукай шигырьләре», «Хуҗабикә», «Минем күңелем», «Дефиле», «Хәрәкәттә - бәрәкәт» бәйгеләрендә үзләрен күрсәтә алды. Нәтиҗәдә «Сәхнә остасы» номинациясендә Куады авылы кызы Гөлшат Хәсимова, «Иң шаян кыз» - Иске Абдул авылыннан Илзирә Фәрваева, «Иң сөйкемле кыз» - Күзкәйдән Алия Асылмәрдәнова һәм «Иң сылу кыз» номинациясендә Яңа Бүләктән Инзилә Ахунова калдылар. Ә «Сабан туе гүзәле-2016» район бәйгесе җиңүчесе итеп, Комсомолец поселогыннан 17 яшьлек Алсу Сәлахова билгеләнде.