Республикабызда «IT-чемпион» конкурсы бара

Республикада 15 марттан «IT-чемпион» конкурсы старт алды. Әлеге бәйге 10 декабрьгә кадәр дәвам итәчәк. Хәзер исә конкурста Татарстан Республикасының барлык районнарыннан 75000нән артык мәктәп укучысы катнаша. Яшүсмерләр барлыгы 85000нән артык татарстанлыны хезмәт күрсәтү порталы белән ничек эшләргә кирәклеген өйрәткәннәр. Актив районнар арасында тукайлылардан кала, Балтач, Теләче, Мөслим, Саба, Чирмешән районнары да бар. 2013 елда үткәрелгән конкурс кысаларында мәктәп укучылары барысы бергә 267337 балл җыйган иде. Исегезгә төшерәбез, uslugi.tatarstan.ru хезмәт күрсәтү порталында зурларны теркәгәч, мәктәп баласына 1 балл бонус бирелә. Иң күп балл җыйган һәм барлык дәүләт түләүләрен әлеге портал аша башкарган яшүсмерләр кыйммәтле бүләкләр алачак.

«IT-чемпион» конкурсы ике этапта уза. Беренчесе - 15 марттан 25 майга кадәр, икенчесе - 26 майдан 10 декабрьгә кадәр. Әлеге бәйге «Иң актив мәктәп укучысы» һәм «Иң актив мәктәп» номинацияләре буенча үткәрелә. «Иң актив мәктәп укучысы» номинациясендә иң күп балл җыйган яшүсмерләр ноутбук белән бүләкләнәчәк. Ә «Иң актив мәктәп» исемен алган белем бирү учреждениесенә интерактив җиһаз комплектлары тапшырылачак. Моннан тыш, 3 иң актив мәктәп компьютер (мобиль) сыйныфлар белән җиһазландырылачак.

Районыбызның барлык 24 мәктәбе дә республикакүләм конкурста 100 процент катнаша. Иң активлар рәтендә Боерган төп гомуми белем бирү мсәктәбе, Комсомолец, Борды, Иске Абдул, Теләнче Тамак урта мәктәбе, Куады авылы мәктәп-балалар бакчасы. Татарстанның иң актив мәктәп укучылары исемлегендә районыбызның Круглое Поле поселогы укучысы Роберт Перевозчиков (1424 балл) һәм Бордыдан Наталия Утяшова (1037 балл) бар. Шулай ук республиканың әйдәп баручы мәктәпләре дә билгеле, алар рәтендә Борды урта мәктәбе (барлыгы 1446 балл) һәм Куады авылының башлангыч мәктәп-балалар бакчасы (54 балл). Район мәгариф бүлеге методисты Сания Дәүләтшина биргән мәгълүматларга караганда (8 майга статистика), безнең район Татарстан Республикасының бөтен районнары арасында 6 урында бара (76,8 процент).