«Һөнәр – кулдагы алтын беләзек» бәйгесенең беренче этабы җиңүчеләрен бүләкләдек

Беренче урынны Круглое Поле поселогыннан Зөлфия Фәрхетдинова яулады. Мәптәптә башлангыч сыйныф укытучысы булып эшләүче Зөлфия ханымның кулыннан килмәгән эше юк. Аның тәрәзә төбен җепләрдән бәйләнгән берсеннән-берсе матур чәчәкләр бизәп тора икән. Ул бөтен күңел җылысын биреп шушы матурлыкны тудыра.

- Чәчәкләр бәйләү белән 1 ел гына шөгыльләнәм әле. Өйрәнеп карау өчен генә башлаган идем. Якыннарым да, туганнарым да хуплап чыктылар. Моннан тыш, мин әле шәлләр дә бәйлим. Аларын гына конкурска җибәреп булмады, - дип сөйләде Зөлфия ханым безгә.

Зөлфия Фәрхетдинованың «Якты юл» газетасы сайтында (http://www.tukai-rt.ru) искиткеч матур кул эшләре иң күп тавыш җыйды - 836! Без исә җиңүчебезгә татар эстрадасының артисты, композитор, алып баручы, автор-башкаручы Илнур Гомәров концертына 2 кешелек чакыру билеты тапшырдык.

Икенче җиңүчебез - Яңа поселогыннан ыргак белән бәйләүче Нурия Абдуллина. Ул 35 ел гомерен балалар тәрбияләүгә багышлаган, бүгенге көндә исә поселокның мәдәният йортында эшли.

- Бар иде юк заманнар, - дип сөйли Нурия Абдуллина бәйләргә өйрәнгән вакытлары турында. - Балаларга башлык, бияләй, җылы кофталар кирәк, ә кибеттә бернәрсә дә юк! Өч улымны үстергән елларда мин бер-бер артлы бер киемне бәйлим дә, соңрак аны сүтеп тагын башканы бәйли башлый идем. Энә белән бәйләгәндә бизәкләрне үзем уйлап чыгарам. Лаеклы ялга чыккач, ыргак белән бәйләргә өйрәнеп, якыннарым, туганнарым, апаларыма 16 шәл бүләк иттем инде, - дип сөйләде ул безгә.

Нурия Абдуллина өчен тавыш җыярга (ә аларның саны 709 булды) уллары һәм киленнәре булышкан.

- Алар минем - горурлыгым, бик яратам үзләрен. Баларым барлык дусларына, якыннарыбызга чаң суктылар, ерак туганнарыбыз да сезнең сайтка кереп, минем өчен тавыш бирде. Бәйләү эшеннән тәм табам, ял итәм, элмәкләр санаганда күңелдә шигырьләр туа, сценарийлар үзеннән-үзе языла, - ди Нурия ханым.

Өченче җиңүчебез итеп, шулай ук Яңа поселогыннан тимердән чәчәкләр коеп ясаучы Айрат Кәримов табылды. Аның өчен сайтыбызда 613 кеше тавыш бирде. Электрик булып эшләүче оста инде ике ел тимерчелек белән мавыга. Металлны кыздыра торган мичне дә, чүки торган өстәлне дә үзе ясаган. Бу эшкә һәвәслек, мөгаен, әнисенең әтисе, Балык Бистәсендә яшәгән, комганнары, сандыклары, япкан түбәләре белән макталган данлыклы тимерчедән киләдер. Тимер роза - үзенең тырышлыгы һәм үҗәтлеге белән ясалган махсус эш. 8 март бәйрәмендә Айрат яраткан тормыш иптәшен матур бүләк белән сөендермәкче була. Тик кибеттән сатып алган әйбер белән хәзерге заманда кемне шаккаттырасың? Ул бар осталыгын эшкә җигеп, тимердән нәфис чәчәк ясый. Бер атнага якын тырыша. Һәм, ялгышмый. Тормыш иптәше Гүзәлия өчен бу роза - иң кадерле бүләк. Айратның хыялы - кабатланмас бизәкләрдән торган мангал ясау.

- Фотоларны җибәрү эшен дә, тавыш бирүне дә тормыш иптәшем башкарды. Бөтенесен Гүзәлия башлап җибәрде. Ул шулай тырышып йөрмәсә, җиңеп тә булмас иде әле, - дип әйтте безгә Айрат, редакциягә килгәч.

Нурия Абдуллина белән Айрат Кәримовка без Татар дәүләт драма театрына «Банкрот» һәм «Ике хуҗаның хезмәтчесе» комедияләренә чакыру билетлары тапшырдык.

Бу бәйгедә катнашырга өлгермәгәннәрне сөендерергә ашыгабыз. Катнашырга теләүчеләр (беренче этапта җиңеп чыкканнардан кала) үз эшләренең фотоларын безнең вакытлыча ясалган электрон почтага (sariya_garipova@mail.ru) 19 гыйнварга кадәр җибәрергә мөмкиннәр.