Мусабай-Заводта яшәүче Шәймиевлар гаиләсе йортсыз кала

Янгын турындагы хәбәр иртәнге 06:15 сәгатьтә килә. Ут бер катлы кирпеч өйне чолгап алган була. Гаилә башлыгы янгынны үзлегеңнән сүндерергә тырышканда күп төрле җәрәхәтләр ала. Ярдәм сорап ачынып кычкырган тавышлардан уянып киткән күршесе дә ярдәмгә ашыга — ул да, авылдашларына булышырга тырышканда, уттан зыян күрә. Янгынның гомуми мәйданы 90 квадрат метрны тәшкил итә. Якынча фаразлар буенча, ут кыска ялганыш аркасында чыккан. Кызганычка каршы, йорт иминиятләштерелмәгән булган.

Шәймиевлар бу йортта гомер буе яшәгәннәр. Әлфия апа озак еллар мәгариф системасында техник хезмәткәр булып эшләгән. Туган йортларыннан диварлар гына калуга карамастан, ирле-хатынлы Чаллыга, балалары янына китүдән баш тарта. «Ходайга шөкер, маллар исән», — ди янгыннан зыян күрүчеләр. Сыер, бозаулар һәм тавыклар зыян күрмәгән.

Әлегә Шәймиевларны күршеләре сыендырган, әмма көннәр җылыну белән алар мунчаларына күчәргә планлаштыралар.

Мусабай-Завод авыл җирлеге башлыгы Эльвира Нуртдинова сүзләренчә, гаиләнең балалары дуслары белән бергә янгын калдыкларын җыештырганнар. Авылдашлары да читтә калмаган: җирле кибеттә акча җыю оештырылган — анда ярдәм өчен махсус савыт куйганнар.