Изгелек кыл

–  Җәй көне үк Теләнче Тамак интернат-мәктәбендә тәрбияләнүче балаларга яңа киемнәр бүләк итәргә теләдем. Мәктәпкә шалтыраттым. «Каникул бит. Барысы да өйләренә таралыштылар», – дип җавап бирделәр миңа. Соңыннан әле бер сәбәп барлыкка килде, әле икенче... Шулай итеп, уй-ниятләрне тормышка ашырып булмады. Район буенча хәйрия марафоны узганын белгәч, мин дә кулдан килгәнчә ярдәм итәргә булдым. Кызлар өчен ике капчык өс киеме әзерләгән идем, әмма аларны авылга илтү мөмкинлеге булмады, – дип сөйләде ул.
Ярдәм көтмәгәндә килә. Эчке эшләр бүлегенең ветераннар советы рәисе, отставкадагы эчке хезмәт подполковнигы Резедә Халикова базардагы бер сатучы белән очраклы гына сөйләшеп китә. Әңгәмә барышында күрше павильонда эшләүче Фәүзия Ситдыйкованың Теләнче Тамак интернат-мәктәбенә яңа балалар киемнәре бирергә теләгәнен, әмма транспорт булмавын белеп ала. Бәлки икенче берәү бу проблеманы тыңлап, шунда ук бу сөйләшү турында онытыр иде, әмма Резедә Фариховна түгел. Ярдәмчел һәм җаваплы кеше буларак, ул проблеманы игътибарсыз калдырмый. Эшнең асылына төшенә, бу мәсьәләне хәл итәргә булышам дип ышандыра. Ул башта Эчке эшләр ветераны, отставкадагы милиция майоры Жәмилә Ризванова белән интернат-мәктәпкә бару мөмкинлеге турында фикер алыша. Җәмилә Җәүдәровна шулай ук Иске Дөреш авылында туып-үскән, 20 елдан артык стажлы шофер. Ул киемнәрне илтергә үзе алына.
– Бүләкләребезне алган балаларның фотоларын күргәч, күз яшьләре килде. Көтелмәгән җирдән ярдәм биргән өчен мин Аллаһы Тәгаләгә рәхмәтле, – дип сөйләде Фәүзия Ситдыйкова.
Беренче карашка, әлеге вакыйга бары тик очраклы туры килү чылбыры гына. Һәркемнең кирәкле вакытта, кирәкле урында булуы гаҗәпләндерә. Теләк булса, мөмкинлек табылыр, дип юкка гына әйтмиләр. Билгеле, үз изгелегең дә үзеңә кире әйләнеп кайта.