Картадан картага акча күчерүчеләр игътибарына: контроль көчәя

Элек салым органнары сезнең счетны тикшерү өчен махсус сәбәп яки рәсми карар көтәргә мәҗбүр иде. Хәзер барысы да җиңеләйде:

• Банклар шикле һәм даими күчерүләр турында мәгълүматны салым хезмәтенә үзләре җибәрәчәк.
• Кереме булган кешеләрне тикшерү өчен салым органнары өстәмә рөхсәт көтеп тормаячак.

Кемнәр контрольдә булачак?

Күпләрне кызыксындыра: «Ничә сумга кадәр күчерергә була?» Закон буенча конкрет чикләүләр юк. Игътибар системалы һәм даими күчерүләргә юнәлтелә.

Беренче чиратта түбәндәгеләр контрольгә эләгергә мөмкин:

• Рәсми булмаган рәвештә фатирны арендага бирүчеләр;
• Өйдә хезмәт күрсәтүчеләр (ремонт, матурлык хезмәтләре һ.б.) яки онлайн сату итүчеләр;
• Керемнәрен яшереп, картага даими акча алучылар.

Салым түләргә туры киләме?

Әгәр салым органнары сезгә килгән акчаны керем дип санаса (бизнес яки эш хакы):

• 13% керем салымын түләргә кирәк булачак;
• Өстәмә штрафлар һәм пенялар да исәпләнәчәк.

Кайсы очракта куркырга кирәкми?

Акча түбәндәге максатлар өчен килгән булса, салым түләргә кирәк түгел:

• Туганнар яки дуслар бүләк иткән акча;
• Бурычны кайтару;
• Бер тапкыр гына булган күчерүләр.

Әгәр күчерүләр зур яки еш булып тора икән, акчаның «бизнес» түгел, ә «бурыч» яки «бүләк» икәнен расларга туры килергә мөмкин. Шуңа күрә күчерү ясаганда “сообщение” бүлегендә максатын язып кую (мәсәлән, "бурычны кайтару") зыян итмәс.

Иң ышанычлы юл

Керемнәрне легальләштерү — мәсәлән, үзмәшгуль (самозанятый) булып теркәлү — сезне сораулардан һәм штрафлардан саклый.