Тукай спортчылары Бөтенроссия һәм республика ярышларында җиңүчеләр

Биатлон: Россия беренчелегендә тарихи уңыш

23-29 сентябрь көннәрендә Смоленск өлкәсендә яшүсмерләр арасында биатлон буенча Россия беренчелеге узды. Татарстан җыелма командасы составында Дилфәт Кашапов һәм Тимур Игнатьев чыгыш ясады. 28 сентябрьдә Дилфәт кросс-эстафетада тарихи җиңү яулады, ул Россия беренчелегендә бу дисциплинаны яулаган беренче татарстанлы булды. Шул исәптән безнең спортчыларыбыз ярдәме белән республика командасы гомумкоманда зачетында өченче урынны алды.

Без егетләребез белән горурланабыз һәм аларга яңа җиңүләр телибез! Ата-аналарына һәм тренер – Ришат Марат улы Вәлиевка аерым рәхмәт.

Лазертаг: иң көчлеләр билгеләнде

27 сентябрьдә Тукай районында авыл җирлекләре арасында лазертаг буенча чемпионат узды. Көчле көрәштә 8 команда арасында пьедесталдагы урыннар түбәндәгечә бүленде:

алтын – Биклән авыл җирлеге;

көмеш – Комсомол авыл җирлеге;

бронза – Күзкәй авыл җирлеге.

Барлык призерлар кубоклар, медальләр һәм кыйммәтле бүләкләр алды.

Йөзү: Круглое Поле мәктәп балалары җиңү яулады

26 сентябрьдә «Акчарлак» бассейнында йөзү буенча район ярышлары узды, анда 84 мәктәп укучысы катнашты.

Нәтиҗәләр:

1 нче урын – Круглое Поле поселогы мәктәбе командасы (эстафетада да җиңүче булды);

2 нче урын – Бәтке мәктәбе;

3 нче урын – Новотроицкое мәктәбе.

Шәхси зачетта иң яхшылар Круглое Поле поселогы мәктәбеннән Әминә Килдибаева һәм Радмир Гыйләҗев булдылар.

Милли спорт төрләре: «Аударыш»та җиңү

Лениногорск шәһәрендә узган III «Без – татар» милли спорт төрләре спартакиадасында безнең спортчы Инсаф Хөсәенов «Аударыш» көрәше буенча ярышларда зур җиңү яулады. Инсафны һәм аның тренеры Нәсим Гыйләҗевны югары нәтиҗәләр белән котлыйбыз!

"Без – татарлар" милли спорт төрләре буенча III Спартакиада кысаларында татарлар тупланып яши торган төбәкләрдән – Татарстан Республикасы, Пермь (Барда авылы), Киров, Краснодар (Сочи шәһәре), Самара өлкәләре, Лениногорск районы җыелма командасы һәм башкалардан 100 дән артык спортчы катнашты. Барлыгы 22 комплект медаль һәм 17 кубок уйнатылды.