Тукайлылар хезмәттә дә, бәйрәмдә дә үрнәк күрсәтә

Бәйрәм ачылышында чыгыш ясап, Тукай районы башлыгы Камил Нәҗмиев җирлектәге күпмилләтле халыкның бердәмлеген ассызыклады:

«Безнең төбәктә төрле милләт һәм төрле дин вәкилләре бергә, дус яши, биредә искиткеч хезмәт сөючән кешеләр хезмәт итә. 2026 ел республикабызда Каһарманлык елы дип игълан ителде. Махсус хәрби операциядә кыю егетләребез тынычлыкны саклый, без аларны өйдә исән-сау көтәбез. Бәйрәм уңаеннан барчагызга да уңай хисләр, ныклы сәламәтлек һәм мул уңышлар телим!» – диде район җитәкчесе.

Тантананың мәртәбәле кунагы – «Беренчеләр хәрәкәте» иҗтимагый оешмасының төбәкара җитәкчесе, район кураторы Тимур Сөләйманов тукайлыларның хезмәт сөючәнлеген аерым билгеләп үтте.

«Тукайлылар эшли дә белә, бәйрәм дә итә белә», – дип, ул ТР Рәисе Рөстәм Миңнехановның тантаналы котлау сүзләрен халыкка җиткерде.

Бәйрәмдә ватанпәрвәрлек һәм фронтка ярдәм темасы да тирән чагылыш тапты. ТР Дәүләт советы депутаты, «Батырлык ордены» кавалеры Эдуард Шәрәфиев авыл халкының тылдагы зур ролен сызык өстенә алды.

«Фронт тылсыз булмый. Без бүген авыл хезмәтчәннәрен котлыйбыз. Биредә батыр егетләребез булганга күрә, без тыныч шартларда бәйрәм итә алабыз. Күгебез һәрчак тыныч булсын!» – дип белдерде ул.

Тукай районы халкын һәм кунакларны шулай ук Чаллы шәһәре Башкарма комитеты җитәкчесе Фәрид Сәлахов та кайнар котлады.

Мәйдан уртасында Тукай районының гимны яңгыраганда тамашачылар кушылып җырлады, аны танылган җырчы Илзирә Ибраһимова башкарды. Быелгы Сабантуйның төп байрагын күтәрү исә узган елгы көрәш ярышларының батыры Илгиз Дәүләтгәрәевка тапшырылды.