Мәктәпләр өчен бердәм дәреслекләр әзерләнә

Россия Мәгариф министрлыгы мәктәптә укытыла торган барлык фәннәр буенча бердәм дәреслекләр әзерләү эшен дәвам итә. Бу хакта РИА Новости агентлыгына ведомство башлыгы Сергей Кравцов хәбәр итте.

Аның сүзләренә караганда, ел ахырына кадәр федераль исемлеккә бердәм дәреслекләр кертелергә мөмкин. Алар 10–11 сыйныфлар өчен рус теле, әдәбият, химия, физика, биология фәннәрен, шулай ук 5–9 сыйныфлар өчен хезмәт дәресен колачлаячак.

Кравцов билгеләп үткәнчә, киләчәктә барлык гомуми белем бирү фәннәре буенча бердәм дәреслекләр булдыру планлаштырыла. 2026 ел ахырына таба бу исемлек тагын да киңәйтелеп, мәктәпнең төп һәм югары баскычларын тулысынча диярлек үз эченә алачак.

Мондый дәреслекләр әзерләү эшендә Россия Фәннәр академиясе дә актив катнаша. Аерым алганда, математика, информатика, физика, химия һәм биология буенча дәреслекләр эшләнә. Бу проект илдә математика һәм табигый-фәнни белем бирү системасын камилләштерүгә юнәлдерелгән зур дәүләт программасының бер өлеше булып тора.