9 сыйныфтан соң көллияткә керә алмаганда нишләргә?

Мондый очракта иң киң таралган юл — мәктәпкә кире кайтып, 10 сыйныфта укуны дәвам итү. Моның өчен директор исеменә гариза һәм 9 сыйныф аттестаты кирәк. Әгәр элекке мәктәптә урын булмаса, район яки шәһәр мәгариф идарәсе башка мәктәп табарга ярдәм итәргә тиеш. Профильле сыйныфларда конкурс булырга мөмкин, ләкин буш урыннар булганда укучыны гади сыйныфка алырга тиешләр.

Күп кенә көллиятләр төп кабул итү кампаниясеннән соң тагын өстәмә көннәр билгели. Чөнки кайбер абитуриентлар документларның төп нөсхәсен китерми яки укудан баш тарта. Шуңа күрә буш урыннар барлыкка килә. Министрлык мәгълүматларына караганда, өстәмә кабул итү еш кына август ахырына кадәр дәвам итә. Моннан тыш, түләүле бүлеккә керү мөмкинлеге дә бар — анда конкурс гадәттә түбәнрәк була.

9 сыйныф тәмамлаучылар документларын бер генә түгел, берничә көллияткә дә тапшыра ала. Уку йортлары Россиянең төрле төбәкләрендә урнашкан булырга мөмкин, белгечлекләрне дә төрлечә сайларга рөхсәт ителә.

Гаризаны «Госуслуги» порталы аша онлайн юлларга, электрон почта белән җибәрергә, шулай ук документларны шәхсән яки почта аша тапшырырга мөмкин.

Көллиятләрдә көндезге бүлектән тыш, кичке һәм читтән торып уку формалары да бар. Документлар кабул итү гадәттә 20 июньдә башлана. Иҗади юнәлешләр өчен гаризалар 10 августка кадәр кабул ителә. Көндезге бүлеккә документлар 15 августка кадәр тапшырыла, ә буш урыннар калган очракта кабул итү 25 ноябрьгә кадәр озайтылырга мөмкин. Читтән торып һәм кичке бүлекләргә исә кайчак 1 декабрьгә кадәр дә керергә мөмкинлек бар.

Чыганак: Татар-Информ

Фото: © «Татар-информ», Михаил Захаров