Авыл матурлыгы – төзек, чиста булуда

Атна башында район башлыгы Фаил Камаев ТРсы Рәисе Рөстәм Миңнехановның «Безнең ишегалды» программасының гамәлгә ашырылуына кагылышлы күчмә киңәшмә уздырды.

Анда район башлыгы урынбасары Рөстәм Закиров, район башкарма комитеты җитәкчесе Айрат Хәбибуллин, Тукай РЭСы начальнигы Артур Фәрдиев, «Автострой» оешмасы җитәкчесе Сергей Фрикк, «Бәтке коммуналь челтәрләре» ҖЧҖе директоры Григорий Петров, «Татарстан коммуналь челтәрләре» җәмгыяте директоры Риф Миңнекаев катнашты.

Шулай ук киңәшмәдә Биклән, Мусабай-Завод, Борды авыл җирлеге башлыклары да катнашты.

Фаил Мисбах улы программа кысаларында башкарылган һәм алып барылучы эшләр белән танышып чыкты. Киңәшмә барышында ул төзелеш эшләрен төгәлләүне тизәйтергә, ишегалларын гына түгел, ишегалды янындагы территорияләрне дә тәртипкә салырга, чүптән арындырырга киңәш итте. Шулай итеп, “Безнең ишегалды” программасы - ишегалды территориясен төзекләндерү, уен мәйданчыкларын ремонтлау һәм яңарту, ял итү зоналарын һәм мәйданчыкларын төзекләндерү, шулай ук ишегалларын заманча куркынычсызлык системалары белән җиһазландыру өчен эшләнә һәм гамәлгә ашырыла торган проект.