Июнь аенда җиләкне тәрбияләү серләре
Җиләк — бакчада иң яратып үстерелә торган җимешләрнең берсе. Июнь аенда ул инде беренче җимешләрен дә бирә. Шулай итеп, күпләр бу вакытта беренче җиләкләрне җыеп өлгерә. Әмма уңыш җыеп алдың да, эш бетте дип уйлау дөрес булмас. Чөнки хәзер тагын бер мөһим этап башлана.
Җимеш бирүнең төп дулкыны узгач, җиләк куакларын яңадан торгызу, аларга көч тупларга ярдәм итү өчен уңай шартлар тудырырга кирәк. Моның өчен түбәндәге эшләр башкарырга киңәш ителә:
Мыекларын бетерү. Әгәр сез җиләкне үрчетү өчен кулланмыйсыз икән, мыекларны вакытында кисеп ташлау мөһим. Алар куакның көчен ала һәм аның яңаруын акрынайта. Бу эшне үсемлеккә зыян китермичә, үткен кайчы яки секатор белән башкару яхшы.
Яфракларны кисү. Уңыш җыелганнан соң берничә көн үткәч, иске, саргайган һәм зарарланган яфраклар кисеп алына. Бу авырулар таралуын кисәтә, куаклар арасындагы һава әйләнешен яхшырта һәм яшь, сәламәт яфраклар үсешен көчәйтә.
Ашлама кертү. Киләсе сезонга яхшы әзерлек өчен җиләкне фосфор-калийлы ашламалар белән тукландыралар. Агач көле, суперфосфат, калий сульфаты иң нәтиҗәлеләрдән санала. Шулай ук сыер тизәге яки үлән төнәтмәсен 1:10 нисбәтендә кулланырга мөмкин.
Мүлчәләү. Кирәкмәгән яфраклардан арындырып, тукландырудан соң түтәлләрне салам, печән, нарат ылыслары яки торф белән каплау файдалы. Бу туфрактагы дымны саклый, тамырларны эссе көннәрдә артык кызудан яклый һәм чүп үләннәренең үсүен киметә.
Су сибү. Яңа бөреләр формалашу чорында, ягъни уңыштан соң ук, җиләкләргә даими, ләкин чама белән су сибү кирәк булачак. Иртә яки кич белән сибү иң яхшысы, ләкин артык су салып тамырларның черүенә юл куймаска кирәк.
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Нет комментариев