Һәлакәткә поши сәбәпче

19 июнь көнне, якшәмбедә, кичке якта район юлларында бер-бер артлы ике һәлакәт теркәлде. Сәгать 8 тулганда Сарманнан Яр Чаллыга килүче «унлы» машинасын йөртүче 46 яшьлек хатын-кыз тизлеген арттырып, идарә итүне югалта һәм юл кырыена төшеп әйләнә. Баш мие җәрәхәтләре алган йөртүче үзе һәм аның 12 яшьлек улы БСМПга озатыла.

Төнге сәгать 10да Яр Чаллы - Зәй - Әлмәт трассасыннан хәрәкәт итүче «Нива» автомобиле каршына поши килеп чыга. Поши «Нива»га бәрелеп, якындагы «ундүртле» машинасының өстенә төшә. Нәтиҗәдә икенче автомобиль юл кырыена төшеп китә. Һәлакәттә «ундүртле»нең 21 яшьлек йөртүчесе зыян күрә. Ул шулай ук баш мие җәрәхәтләре белән больницага җибәрелә.