Тукай районы яңа уку елына әзерләнә

2025/2026 уку елы башланыр алдыннан Тукай муниципаль районында мәгариф учреждениеләрен актив әзерләү төгәлләнеп килә. Балаларны укыту һәм үстерү өчен уңайлы шартлар тудырыла: инфраструктура яңартыла, заманча җиһазлар сатып алына һәм өстәмә белем алу өчен мөмкинлекләр киңәйтелә.

Яңа уку елында балалар өчен 19 муниципаль балалар бакчасы һәм мәктәпкәчә төркемнәр белән 8 мәктәп, 22 гомуми белем бирү мәктәбе (17 урта һәм 5 төп),  Теләнче Тамак интернат-мәктәбе үз ишекләрен ачачак.  

Мәктәпкәчә учреждениеләр эшли башлады инде, ә төркемнәр сабыйларны 4 августтан кабул итәчәк. Быел парта артына 4 976 укучы утырачак (узган елга караганда 213кә күбрәк). Алар арасында – 520 беренче сыйныф укучысы, алар өчен быел беренче мәктәп кыңгыравы яңгыраячак. 10 нчы һәм 11 нче сыйныфларга 82 һәм 65 укучыны кабул итү планлаштырыла. Мәктәпкәчә белем бирү программасында 1 717 бала катнашты, шул ук вакытта 474 бала беренче тапкыр балалар бакчаларына юллама алды.

1 сентябрьдән мәктәп укучыларын 30 маршрут йөртәчәк (алданрак – 27). Көн саен автобус районыбызның 18 мәктәбенә 1 800 бала китерәчәк. Төп ташучы итеп "РЕГИОН ТРАНС СЕРВИС" ҖЧҖ билгеләнде (21 маршрут). Калган өч маршрут буенча (Яңа, Кече Шилнә, Калмаш мәктәпләре)  кем йөртәчәге 15 августта билгеләнәчәк. Ә 6 августта Кукмарада биш яңа автобусны тантаналы тапшыру булачак, бу укучылар өчен транспорт белән тәэмин ителешне сизелерлек яхшыртачак.

Уку елына әзерлек тулы куәтенә бара. Республика бюджеты кысаларында,  Кече Шилнә мәктәбенә капиталь ремонт ясала, өстәмә белем бирү корпусы төзелә, Теләнче Тамак мәктәбендә азык-төлек блогы төзекләндерелә. Иске Абдул мәктәбендә «Гөлчәчәк» балалар бакчасын урнаштыру төгәлләнде. «Агросәнәгать комплексына кадрлар» федераль проекты һәм Сәйдәшев исемендәге җитештерү предприятиесе ярдәме белән химия кабинеты ремонтланачак һәм җиһазландырылачак.

Район мәктәпләрендә гаять зур яңартулар булды. Шулай итеп, Мәләкәс мәктәбендә янгынга каршы ишекләр, яңа парталар урнаштырылды, печән чапкыч сатып алынды. Түбән Суыксу мәктәбендә технология кабинетына 3 проектор сатып алынды, кабинетларга косметик ремонт ясалды. Калмашта – парталар һәм урындыклар, технология кабинетына эш өстәлләре булдырылды. Комсомол мәктәбендә  уку кабинетларына косметик ремонт ясалды. Сәмәкәй авылында актлар залы ремонтланды, урам эскәмияләре яңартылды, кабинетларның стеналары буялды. Бәтке авылында уку кабинетларына, дәресләр арасында ял итү  бүлмәсенә косметик ремонт ясалды. Яңа поселогы мәктәбендә уку кабинетлары ремонтланды, азык-төлек блогының яшелчә складына кондиционер урнаштырылды.

“Мәктәпкә җыенырга ярдәм ит” акциясе -  быел аз керемле, күпбалалы гаиләләрдән 63 беренче сыйныф укучысы, шулай ук махсус хәрби операциядә  катнашучыларның балалары һәм сәламәтлек мөмкинлекләре чикле балалар ярдәмгә мохтаҗ. Районда барлыгы 148 укучы — махсус хәрби операциядә катнашучы хәрби хезмәткәрләрнең балалары. Битараф булмаганнарны акциягә кушылырга чакырабыз!